Shillong, Rymphang 09
Ka Laitkynsew CC bad ka Marbisu CC ki la ïoh ïa ka jingjop ha ka 4th District League T20 Cricket Tournament 2024 ba la pynïaid da ka East Khasi Hills Cricket Association ha ka sngi Saitjaiñ ha madan Saitsohpen, Sohra.
Ha kane ka jingïakhun ka Laitkynsew ka la pynliem noh ïa ka Rangshken ACC da 48 run. Ka Laitkynsew kaba la kam trai ban tied nyngkong ka la ïoh 142 run bad shah pynhap 8 wiket ha ki 20 over. U Jesper Malngiang u la tied 37 run na ki 37 bol. Katba u Kisstar Janong u la shim 2 wiket n na ka bynta 4 over.
Haba wan beh ïa ka thong ba la buh da ka liang pyrshah, ka Rang-shken ACC ka la ïoh tang 94 run hadien ba ka la shah pynkhyllem baroh ki nongtied ha ki 18.1 over. U Kyrmenskhem Nongrum u la tied 32 run na ki 18 bol. Katba u Larikupar Malngiang u la shim 3 wiket na ka bynta 4 over bad ïohpdiang ruh ïa ka nam Player of the Match.
Haba phai sha kawei pat ka jingïakhun kaba ar, ka Marbisu CC ka la jop da 6 wiket ïa ka Mawryng -kneng CC. Ka Marbisu kaba la jop kynting pisa ka la ailad ïa ka Mawryngkneng ban tied nyngkong ha kaba ka la kamai 99 run bad shah pynhap baroh ki nongtied ha ki 18.2 over. U Moon-light War u la tied 18 run na ki 15 bol. Katba u Ramesh Rai u la shim 4 wiket na ka bynta ki 4 over.
Haba wan shimti ïa ka pali kaba ar, ka Marbisu CC ka la lah ban kynjoh sha ka thong da kaba ïoh 100 run bad shah pynkhyllem 4 wiket ha ki 17.3 over. U Ramesh Rai u la tied 35 run ba ki 23 bol bad uba ïohpdiang ïa ka nam Player of the Match. Katba u Wankit-lang Nongpluh u la shim 2 wiket na ka bynta ki 4 overs
Ka jingïalehkai ha ka Lah Sngi U Blei kan long hapdeng ka Laitkynsew pyrshah ïa ka Cricket Lovers ha ka por 9 baje mynstep, katba ka Sohra Combine CC ïa ka Mawryngkneng CC ha ka por 12:30 mynsngi.
