Shillong, Rymphang 09
Ki ar kol ba la thep da u Ronney Wilson Kharbudon ki la biang pura ïa ka Shillong Lajong ban wanphai da ka jingjop ïa ka Namdhari FC da 3-2 kol ha la ïing ha ka lympung ïalehkai I-League 2024-25 ha ka sngi Saitjaiñ ha SSA Stadium kaba ha First Ground, Polo.
Wat la ka Lajong ka la mad ïa ka jingshah rem ha Srinagar ha ka Real Kashmir da 2-0 kol ha ka jingïaleh-kai ba la dep, pynban ha kane ka jingïakhun ha la ïing ka Shillong Lajong ka la pyni ïa ka jingkhlaiñ bor ha kaba ka la ïoh ban pynkhih jar nyngkong lyngba u Figo Syndai ha ka minit kaba 7. Hynrei ha shwa ban kut ka jingïalehkai jong ka kylla step ka Namdhari ka la lah ban pynphai kylla lyngba u Francis Addo (45+2) na ka bynta ban ïakhaid mar shi kol.
Katba ka Namdhari ka la lah ban jop ha la ïing da 5-2 kol ïa kane ka kynhun ïalehkai ka nongbah, hynrei ha kane ka jingïakhun ka Lajong ka la wanphai da ka jingkhlaiñ bor ha kaba u Ronney u la ïoh ban thep haduh ar kol ha ka minit kaba 60 bad 71.
Wat la ka Namdhari ka la shah thep haduh lai kol, hynrei shwa ban wai ka la lah ban pynphai kylla shi kol lyngba u Francis Addo (89) ha shwa ba kan mad ïa ka jingshah rem.
Lyngba kane ka nam jop ka Lajong ka la jam sha ka kyrdan ba hynriew ryngkat 19 point na ki 13 sien ïakhun, katba ka jingshah rem ka Namdhari ka la pynlong ban duh ïa ka lad ban jam sha ka kyrdan ba ha khlieh hadien ba ka Churchill Brothers ka dang tam da 2 point na ka bynta ban lamkhmat ha kane ka lympung.
Te kumta ka Lajong kan pynkhreh biang ïa ka jingïakhun ha la ïing pyrshah ïa ka Sreenidi Deccan FC ha ka 14 tarik mynta u bnai ha ka por 7 baje janmiet. Ha ka jingïalehkai ba la lah, kine ki kynhun ki la ïakhaid mar 5-5 kol.
