Shillong, Rymphang 09
Ka Sporting Spirit SC na Mawsiatkhnam ka la rah ïa ka nam lahduh ha ka Football Tournament ba la pynïaid da ka Umrynjah Sports and Cultural Club. Kane ka la wan urlong hadien ba ka la lah ban pynliem noh ïa ka Nongkohlew SC da 1-0 kol ha ka jingïakhun ia ka final kaba la long ha ka sngi Saitjaiñ ha madan Umrynjah.
Lyngba kane ka nam jop ka Sporting Spirit SC ka la ïoh khung ïa ka song pisa kaba T. 20,000 tyngka, katba ka Nongkohlew kaba wan ba-ar ka la ïoh 10,000 tyngka. Ïa ki khusnam la sam da u Astorious Lyngdoh kum u kongsan ba la synran lang da u Bah Ferdinand Jyrwa ha ka jingdon ryngkat ki nongkitkam ka Umrynjah S&CC bad kiwei kiwei. Ha kane ka lympung ïalehkai ki la don baroh 32 tylli ki kynhun kiba la ïashim bynta.
