Shillong, Rymphang 10
Ka Ryntih FC ka la sei bor bah ban pynliem ïa ka Nongthymmai SC da 4-1 kol ha ka Shillong Premier League 2024 ha ka Lah Sngi U Blei ha SSA Sta-dium kaba ha First Ground, Polo na ka bynta ban pynkut ïa ka jingshah rem kaba khatwei sien lynter ha kane ka lympung.
Katba ka Shillong Lajong FC ka la lah ban pynjem khnap haduh shiteng dorjon (6-0 kol) ïa ka Laitkor SC.
Ka Ryntih kaba la pynliem ïa ka Nongthymmai da 3-0 kol ha ka jingïakhun jong ka wat ba nyngkong ha ka 17 tarik u Risaw bad hadien kata ka la mad da ki jingshah rem haduh khatwei sien. Hynrei mynta ka kynti ka la wanphai biang da ka jingjop ha kaba ïa kine kol la thep da u Wanshanlang Dkhar (53’P & 82′) bad u Andy Mawthoh (57′ & 68′), katba u Mowell Chyne (79′) u la lah ban pynphai kylla shi kol ïa ka Nongthymmai.
Kham shwa, ka Lajong ka la jop ïa ka Laitkor lyngba ki kol na u Yohaan Benjamin (8′), Deiborma-me Tongper (64′), Ïohborlang L Lyngkhoi (83’P), Emanbha Marbaniang (86′), u Babysunday Mar-ngar (90’+4P) bad ïa kawei pat la ïarap pynthep da uwei na ki rangïalehkai ka liang pyrshah.
Lyngba kane ka jing-jop ka Lajong ka la jam sha ka kyrdan ba hakhlieh hadien ba ka la tam lyngba ka ‘goal average’ ïa ka Mawlai SC bad ka Rang-dajied United FC wat la baroh lai tylli ki la ïaryng-kat mar 29 poiñ, hynrei ka Rangdajied ka don ha ka kyrdan kaba lai. Kumba ka paw ka Lajong ka la tam ha ka jinglah ban thep bad shah thep kol da (+29 haduh +21). Hynrei ka Mawlai ka lah ban knieh biang ïa ka kyrdan ba ha khlieh duh lada kan jop ne ïakhaid ha ka Sngi Ba-ar pyrshah ïa ka Nangkiew Irat SC.
Ka jingjop jong ka Ryntih kam shym la lah ban pynkylla ïa ka kyrdan jong ka namar ka dang ïai sah hi shatrai duh jong ka miej kheiñ poiñ, hynrei ka la ïoh 6 poiñ bad ka dang duna da 2 poiñ ïa ka Nongthymmai. Hynrei ka jingshah rem ka la pynlong ïa ka Nongthymmai ba ka dang don hapdeng ka jingartatien ban lait na ka jingshah pynhiar kyrdan.
Ka SLFC ka la thep tang shi kol ha ka kylla step lyngba u Yohaan Benjamin tang hapoh 10 minit hynrei hadien u la shah pynmih bujli noh namar ka jingmynsaw. Ka jinglah ban thep kol ki la bteng biang ha ka kylla miet, hynrei ar tylli na kine ki dei lyngba ki penalty- ka jingshah pynur u Baby-sunday ha u rangapkol ka Laitkor u Hukum-skhem Marbaniang ka la pynlong ïa u Ïohborlang L. Lyng-khoi ban thep kol nyng-kong, katba hadien la thep sa u Babysunday hadien ka jingshah pynur u Samchaphrang Lato.
U Samchaphrang u la ïoh ha ka kylla miet haba u la rah ïa ka bol shapoh ‘box’ bad ula ïatakhuh bad ka boot jong u Batskhem-bor Nongkynrih ka Lait-kor shwa ba kan rung sha-poh kol. Ka jingïalehkai stet kaba itynnad hapdeng u Babysunday bad u Deibormame ka la pynlong ban thep kol bad u Emanbha, uba dang shu mih thymmai na jaka shong, u la mareh shapoh synduk bad mar kumta hi u la thep kol. Hynrei u la mynsaw hadien ba u la kum ïatakhuh bad u rangïalehkai shadien jong ka Laitkor bad u la hap ban shu shong peitkai ïa ka jingïalehkai haduh kaba kut.
Ha kawei pat ka jingïakhun ym shym la don ba lah ban thep kol ha ka kylla step, hynrei ka Ryntih, ka bym shym la don ki nongbujli kiba lah ban ïalehkai ha kane ka jingïakhun, ka la pynkhih jar nyngkong lyngba u Wanshanlang, uba la thep lyngba ka penalty hadien ka jingshah pynur u Ban-teilang Shylla. Hadien saw minit u Andy u la rung shakhmat na ka bynta ban pynbud ïa ka kol kaba ar hadien 10 minit.
Ka Nongthymmai ka la sdang hiar hadien kane hynrei u Mowell Chyne u la ai jingkyrmen katto katne ba kan wanphai biang hadien ba u la pynkhih ïa ka bol kaba u nongapkol ka Ryntih u Luckystar Lawai u la ïoh kti hynrei um shym la lah ban khanglad. Hynrei kita ki jingkyrmen ki la jah noh tang hadien katto katne por haba u nongap kol jong ka Nongthym-mai, u Akash Thapa u la leh ïa ka hash kaba pura jong ka back pass bad u Wanshanlang u la tuh ïa ka bol na u bad thep sha ka kol kaba plie.
Hadien katto katne por ka Nongthymmai ka la lah ban pynphai kylla shi kol lyngba u Mowell Chyne hadien ba u rangapokol ka Ryntih u Luckystar Lawai um shym la lah ban pyllait na ka jingshah thep. Hashwa ban wai u rangapkol ka Nongthymmai u Akash Thapa u la kum bakla bad u Wanshanlang u la ïoh ïa ka kabu kaba biang ban thep biang sa shi kol bad ban khur syndon ïa ka jingjop.
Ha ka Sngi Ba-ar kin don ar tylli ki jingïalehkai hapdeng ka Sawmer SC pyrshah ïa ka Nongrim Hills SC ha ka por 11 baje mynstep, katba ka Mawlai ïa ka Nangkiew Irat ha ka por 2:30 nohphai sngi.
