Shillong, Rymphang 10
Ka NWCC bad ka Law-sohtun ki la lah pynthikna ïalade ban jam sha ka final ha ka lympung ïalehkai Second Division Shillong Cricket League 2024-25 ba la pynïaid da ka Shillong Cricket Associa-tion ha ka Lah Sngi U Blei.
Kane ka jinglah ban pynthikna ka NWCC ka la wan urlong hadien ba ka la lah ban pynliem noh ïa ka Cluster CC da 6 wiket ha ka jingïakhun semi final kaba la long ha madan Urkaliar, Shillong. Ka Cluster kaba la kam trai ba kan tied nyngkong ka la ïoh 107 run bad shah pynkhyllem 10 wiket ha ki 17.5 over. U Ankit Sharma u la tied 23 run na ki 24 bol bad u Kasim Sun u la ïoh 18 run na ki 21 bol. Katba u Arvind Singh Toha u la shim 5 wiket bad 2 wiket da u Lakhan Lal na ka bynta ka NWCC.
Haba wan shimti ïa ka pali ba ar, ka NWCC ka la lah ban kynjoh sha ka thong da kaba ïoh 108 run bad shah pynhap 4 wiket ha ki 13.5 over. Kane ka la wan urlong lyngba ka jingïalehkai bha u Sonu Rynjah uba la tied 47 run na ki 24 bol bad u Lakhan Lal u la ïoh 36 run na ki 39 bol. Katba u Gyandeep Kachari u la shim shi wiket na ka bynta ka Cluster. Ïa ka nam ‘Player of the Match’ la ïohpdiang da u Arvind Singh.
Haba phai sha kawei pat ka jingïakhun semi final ba ar, ka Lawsohtun ka la jop da 19 run ïa ka Nongpdeng CC. Ka Lawsohtun kaba la shimti ban tied nyngkong ka la ïoh 142 run bad shah pynhap 4 wiket ha ki 20 over. U Hilarious Thabah u la khyrwit ïa ka shiteng spah kaba 65 run na ki 43 bol bad u Manchester Pathaw u la ïoh 38 run na ki 43 bol. Katba u Donboklang Hookon u la shim 2 wiket na ka bynta ka Nongpdeng.
Haba wan beh ïa ka thong ba la buh da ka liang pyrshah, ka Nongpdeng ka la ïoh tang 124 run hadien ba la shah pynkhyllem baroh ki nongtied ha ki 20 over. U Arnold Nongrang u la tied 21 run na ki 20 bol. Katba u Nick Lyngdoh u la shim 3 wiket bad ïa ki 2 wiket da u Hilarious Thabah na ka bynta ka Lawsohtun bad uba la ïohpdiang ruh ïa ka nam Player of the Match.
