Shillong, Rymphang 13
Hadien ba ka Sorkar Jylla ka la pynbna ba kan pynjlan haduh ar snem kynthih ïa ka Meghalaya Games, uwei na ki nongïalam jong kawei ka synjuk ïalehkai ha ka Jylla u la wan shakhmat ban pynpaw ba kam long kaba biang ïa ki nongïalehkai ba kin duh ïashim bynta ha kino-kino ki lympung ialehkai.
Kane ka jingpynjlan ka Sorkar haduh ar snem ïa ka Meghalaya Games ka long shi bynta ban pynkhreh ïa ka 39th National Games ka ban long ha u 2027 ha Meghalaya.
Haba ïakren bad ki nongthoh khubor ha ka Sngi Palei, u Bah Franky Nongrum, General Secre-tary ka Meghalaya Powerlifting & Fitness Association u la pynpaw ba kam long kaba ïahap ba ki nongïalehkai kin ym ïoh ban ïashim bynta ha kino-kino ki lympung ïalehkai, hynrei ka Sorkar ka dei ban plie lad ïa ki da kaba kan pynlong ïa kiwei pat ki jingïakob na bynta jong ki la ka long ki District Level Competition khnang ba kan ym pynduh mynsiem ïa ki bad ba kin long kiba la khreh na ka bynta na National Games ka ban sa long ha u 2027 ha kane ka Jylla.
Kumba ka paw ka jingpynlong ïa ka Meghalaya Games naduh lai snem kynthih ha Shillong, Tura bad ha Jowai ka la pynlong ïa ki khynnah ba kin long smat ïa lade ba kin kilanmet baroh shi snem bad kane ka pyni shai lyngba ka jinglah ban pynpaw ha kitei ki lympung.
“Wat la ngam pat lah ban ong haduh katno ka Sorkar ka la pynkhreh na ka bynta ka National Games ka ban long ha u 2027 namar kumba ka paw ha ka 38th National Games kaba dang ïaid mynta ha Uttarakhand, ka Meghalaya ka dang don ha ka kyrdan ba 30,” u la bynrap.
“Te kumta ngi khmih lynti ba ka Sorkar kan pynleit jingmut na ka bynta ki lympung ïalehkai khnang ba kan long ka jingïarap ïa ka Jylla ba kan ïoh rung hapoh ka thup ba shiphew ha ka National Games ka ban long ha Meghalaya.”
Shuh shuh, u Bah Nongrum u la pynpaw ïa ka jingïaroh halor ka jingpynrung ïa ka jingïalehkai chess ha ki skul kaba la long ka jingïarap ban sei ïa ki khynnah kiba kynsai na ki skul bapher bapher kiba don hapoh ka Jylla.
