Washington, Rymphang:
U President jong ka America, Donald Trump, u la pynpaw ha ka Sngi Balang ba u khmih lynti ban ioh leit ïakynduh markhmat ïa u President jong ka Russia- u Vladimir Putin ha Saudi Arabia na ka bynta ka jingïakren ïasuk bad ka Ukraine.
Ha ka jingïakren ba nyngkong jong ki ba la pynthikna naduh ba u Trump u la wanphai biang sha White House, u President jong ka US u la ong ba u la pynlong ïa ka jingïakren kaba jrong bad ka ban wanrah jingmyntoi bha bad u paralok jong ka Russia u ba la phah leit hiar thma ia ki shipai jong u sha Ukraine ha u snem 2022.
U Trump, u ba la pynbor ban pynkut noh kloi ïa ka thma kaba la jan neh lai snem, u la kyntait ruh ba ka Ukraine, ka shah iehnoh ha ka jingkhriat, da ka jingïakren beit beit hapdeng ki ar tylli ki ri kiba don ïa ki tiar nuclear.
U Trump u la ong ba u khmih lynti ba kane ka jingiakren iasuk kan ym shim por shuh bad u la bynrap ruh ba u Syiem Syiem jong ka Saudi, u Mohammed bin Salman- u ba la don ka bynta kaba kongsan ha ka jingïakylliang koidi hapdeng ka Russia bad ka US ha kane ka taiew ruh un iadon bynta lang.
Ka Russia pat ka la ong ba katei ka jingkhot ka la neh haduh shi kynta shiteng. U Putin bad U Trump, ki la mynjur ba ka por ka la dei ban ïatreilang noh bad ba u nongïalam jong ka Russia, u la khot ïa u paralok jong u, na US ban leit jurip sha Moscow na ka bynta ban pyniaid beit- pyniaid ryntih ia ki kam ki jam baroh kumba la thmu.
