Shillong, Rymphang 14
Ka kynhun ïalehkai jong ka Khatsawphra MMA Dojo na Mairang Eastern West Khasi Hills District ka la khur takma ha ka 4th Open International Kickboxing Tournament 2025 ba la pynlong ha nongbah Delhi.
Ha katei ka lympung kaba la sdang naduh 1 tarik haduh 5 tarik mynta u bnai, katei ka kynhun ka la khur ar tylli ki takma rupa bad ar tylli ki takma rnong.
Ïa ki takma rupa la khur da u Melvin L. Marshillong (-60 kg senior) hadien ba u la shah rem noh ha ka final pyrshah ïa u rangïalehkai ba bat ïa ka kyrdan ba nyngkong na Uzbekistan bad ka Joviality L. Kynshi (-40 kg junior) kaba pule ha ka skul Langtor Higher Secondary School. Katba ïa ki takma rupa la khur da u Apbantei Marbaniang (-72 kg senior) uba pule ha ka Khatsawphra College Mairang bad u Sakibanshai Nongbri (-54 kg senior) uba pule ha Mairang Presbyterian English Secondary School.
Kine ki khynnah kiba la khur takma ki dei kiba la shah hikai pyntbit ïalade ha ka jaka ai jinghikai jong ka Khatsawphra MMA Dojo ba la hikai da u Khrawjutang Kharsyntiew kum coach. Kum u Coach u la pynpaw ka jingsngewnguh ïa ki kmie ki kpa jong ki khynnah ba ki long ki nong ai mynsiem ïa ki khun ban mih shakhmat ha ki kam ïalehkai bad ruh ki la kyrshan ruh met bad mynsiem bad kumjuh ïa ki ‘riew paidbah nongshong shnong ka Mairang bad kiwei.
