Shillong, Rymphang 14
Ka Shillong Lajong FC ka la lah ban pynjem khnap ïa ka Sreenidi Deccan FC da 4-0 kol bad ban khur ïa ki lai poiñ ha ka jing-ïakhun jong ka I-League 2024-25 ha madan First Ground – SSA Stadium, Shillong ha ka janmiet Sngi Thohdieng.
Haba phai sha ka jingïalehkai, u Marcos Rudwere Genar Silva u la thep ar kol lyngba ka penalty ha ka 41 minit bud sa ka kol ha ka minit ba 72. Kiwei pat ki kol la thep da u Kenstar Khar-shong ha ka minit ba 88 bad u Renan Paulino de Souza minit (90’+3) lyngba ka penalty kaba la pynthikna ïa kane kynhun ban khur shalade ïa baroh lai poiñ bad ban jam sha ka kyrdan ba san.
Wat la ka jingkyrshan kaba radbah na ki nongky-rshan jong ka Lajong hynrei dei ka Sreenidi Deccan kaba la synshar bun shah ïa ka bol ha ka kylla step, da kaba tehlakam ïa ka jingïalehkai hapdeng ma-dan wat la ka khlem shym la ïoh ban thaw ïa ki lad ba paka ban thep kol.
Katba ka Lajong kaba ïalehkai ha la ïing, bunsien ka pyndonkam da kaba pynkloi pynrung bol shakhmat ban wanrah jingma ïa ki rangïalehkai shadien jong ka Sreenidi.
Ha ka minit kaba 40, ka Lajong ka la ïoh ban pynïakhlad ïa ka jingïa-khaid lyngba ka penalty. Kane ka la urlong hadien ba u Phrangki Buam u la shah pynur noh ha u rangapkol jong ka liang pyrshah, u Aryan Lamba hapoh ‘box’. U Marcos Rudwere u khlem shym la pynsepei ïa kane ka kabu, bad thep ïa ka kol ban buh hakhmat ïa ka kynhun.
Ka Lajong ka la jan ïoh ban thep kol ha ka 70 minit, hynrei ka jingpyrshang jong u Daniel Gon-calves ban thep da ka khlieh ïa ka bol ba la pashat na ka corner kick ka la lait sharud. Tang katto-katne minit ka Lajong ka la ïoh biang ïa ka corner kick. Ha kane ka por, u Gonçalves, u la pyndei tiak da ka khlieh ïa ka bol ban pynhap ha jaka ba don u Rudwere, uba la khyrwit jlang ban thep ïa ka kol kaba ar na bynta ka Lajong.
U Kenstar Kharshong u la pynbud ïa ka kol kaba lai ha ka minit kaba 88 lyngba ka bol ba la pashat na ka corner kick. Ka jingsohsat ka la nangjur ïa ka Sreenidi Deccan ha ka khyllipmat shwa ban kut, hadien ba la pynïoh biang sa kawei ka penalty na bynta ka Lajong. U Renan Paulino u la pynrung jlang ïa kane ka penalty ban pynlong saw kol bad khur pura ïa ki 3 poiñ na bynta ka Lajong.
Kane ka namjop ka la kyntiew ïa ka SLFC sha ka kyrdan ba san ha ka miej kheiñ poiñ hadien 14 tylli ki jingïalehkai ryngkat 22 poiñ. Katba ka Sreenidi ka shong ha ka kyrdan ba khyndai ryngkat 16 point.
Ka Lajong kan ïakhun pyrshah ïa ka Dempo SC ha ka 19 tarik u Rym-phang shabar na la ïing ha Fatorda Stadium Goa.
