Shillong, Rymphang 14
U Bah Raynold Kharkamni u la shimti mynta kum Secretary bathymmai jong ka Meghalaya Cricket Association (MCA) kaba baroh shi katta ïa kane ka kam la bat da u Bah Gideon L. Kharkongor.
Kane ka jingshimti u Bah Raynold uba dei artad u President ka Ri Bhoi District Cricket Association (RBDCA), ka la wan hadien ba la pynbna ïa ka ilekshon shiteng samoi jong ki Councillor sha ka Apex Council ha ka Sngi Palei jong ka taïew hadien ba la khmih bniah bha ïa ki kot ki sla kaba dei na ka bynta lai tylli ki kam kiba lait jong ka MCA.
Ïa kane ka ilekshon la wan ban peit bad pynïaid da u Bah W Khyllep, IAS (Retd), Chief Electoral Officer barim jong ka jylla.
Nalor u Bah Raynold Kharkamni, la jied ruh ïa u Sengnab Momin kum u Vice-President, katba na ka liang u Bah Gideon Kharkongor un dang ïai don ha ka synjuk bad un long noh tang kum u dkhot ne Councillor.
