Washington, Rymphang:
U President jong ka U.S, Donald Trump, u la ong ha ka Sngi Baslang ba ka sorkar US ka dang lah ban aipor ia ka jingbuh por jong u kaba 75 sngi ban pynsangeh treikam ia ka App ba pawnam ka ‘TikTok’ kaba long ruh ka rynsan ‘Social Media’ kaba ïaid iew tam khamtam ha ki khynnah- samla jong kane ka juk ba mynta, hynrei u la ong ba kane ka kam, kam long kaba da kongsan than haduh katta.
Ha ka jingkren sha ki nongthoh khubor ha Oval Office, u Trump u la ong ba u dang don ka jingkyrmen ban ïasoi ïa ka soskular ha ka TikTok ban pynim ïa kane ka App ha U.S., da kaba ai burom ïa ka ba ka la ïarap ïa u ban jop ha ka ilekshon President jong u snem 2024.
Namar la ong ba katei ka App ka la shu per halor suiñ naduh ba ka aiñ jong ka US ka la bthah ia u trai jong katei ka rynsan paidbah na China- u ByteDance, ba un pynkut lane die pateng noh ia ka, na ka bynta ka jingshngaiñ jong ka ri.
U Trump, hadien ba u la shimti ia ka shuki President pat ha ka 20 tarik u Kyllalyngkot, u la soi ia ka hukum ka ban aipor sa kumba 75 sngi ia ka jingpyntreikam ia katei ka aiñ ban khang bad pynsangeh treikam noh ia katei ka App ‘TikTok’ hapoh ka ri United States.
Haba kylli hato ka por ba la buh ka la jan kut, u Trump u la ong, Hooid, ka por ba la ailad ia katei ka aiñ ban ym pat pyntreikam lane pynsangeh noh ia katei ka rynsan paidbah ka long 90 sngi naduh ba la pynbna ha ki 2 taiew ba la leit bad u thikna ruh ba ka sorkar US ka dang lah ban pynjlan ia ka por ban ailad ia ktei ka App ba kan dang treikam shuwa, hynrei yn dang hap ban peit-thuh shuwa namar um sngew dei ba ka long kaba da donkam eh haduh kattta ban ailad ia katei ka rynsan ban treikam laitlan kumba long ha kiwei pat ki ri.
Wat la katta, la ong ba ym lah ban pynshai ia kaei ka jingmut jong ka jingpynkylla 90 sngi ban ym pat pyntreikam ia katei ka aiñ ban khang noh ia katei ka App ‘TikTok.
U Trump, u ong ba ki don shibun ki briew kiba kwah ban ioh ia katei ka kompeni bad u ong ba ka jinglong- jingman jong katei ka App, ka la kylla dur naduh ka ilekshon 2024 bad u la ong ruh ba u sngewthuh ba katei ka app ka long kaba treikam hok bad kaba ai jingmyntoi ban ioh ban tur sha ki samla nongshong shnong jong ka ri, kumba long ha ka ilekshon President ba la dep, ha kaba u la lah ban pynkhih win ia ki khun samla jong ka United States baroh kawei tang lynba jong katei ka rynsan paidbah.
U Trump u la pynpaw ruh ba u ngeit skhem ba u President ka China- u Xi Jinping un mynjur ban ai jingmynjur ban die noh ia katei ka rynsan ‘TikTok’ sha u hehspah na U.S khnang ba kan long ruh ka jingmyntoi ia ka ri China.
