Nongstoiñ, Rymphang 16
Ka Pyndengrei SCSC ka la ïoh ïa ka jingjop ha ka Super Division na ka bynta ka NDSA Premier League Football Tournament 2024-25, hadien ba ka la lah ban pynliem noh ïa ka Mawïong Pyndengrei da 2-1 kol ha ka sngi Saitjaiñ ha ha madan New Nongstoiñ.
Tang mar ïasdang ka jingïalehkai ka Pyndengrei ka la ïoh ban pynkhih jar nyngkong eh lyngba u Sylvester Thongni ha ka shi minit, hynrei hadien saw minit ka Mawïong Pyndengrei ka la lah ban pynphai kylla lyngba u Wankerlang Lyngkhoi. Hynrei shwa ban wai ka Pyndengrei ka la lah ban thep biang ïa ka kol kaba ar lyngba u Allan Sohlang ha ka minit kaba 90+ na ka bynta ban khur syndon ïa ka jingjop.
Haba phai sha ka First Division, ka Tiehrit FC ka la pynliem noh ïa ka Nongkynjang SC da 1-0 kol ha madan New Nongstoiñ. Kane ka nam jop ka la wan urlong lyngba ka shi kol ba la thep da u Mostcomfort Nongsiej ha ka minit kaba 10.
