Shillong, Rymphang 18
Ka Rangdajied United FC ka la shah rem noh ha ka Laitkor SC da 0-2 kol ha ka Shillong Premier League 2024, katba ka Langsning FC ka la pynjem khnap ïa ka Sawmer SC da 5-0 kol ha ka Sngi Ba-ar bad u Dauruhipaia Pale u la ïoh hat-trick ha JN Stadium kaba ha First Ground Polo.
Kane ka jingshah rem kam shym la khih ka kyrdan balai ba la bat da ka Rangdajied, hynrei ka la shem jingeh pat ban don ha ka thup ka jingïaknieh na ka bynta ka kyrdan ba ha khlieh. Hynrei ka donkam ban jop ïa ka Mawlai SC bad ka Shillong Lajong FC, bad kyrmen ba kine ar tylli ki kynhun kin shah rem ruh ha kiwei pat ki jingïa-lehkai khnang ba kan lah ban poi sha ka thong. Katba ha kawei pat ka liang ka Sawmer ka dang bteng ban don ha ka jingma ha kaba ka lah ban shah pynhiar kyrdan namar kumba ka long mynta kane ka kynhun ka dang don ha ka kyrdan ba hynñiew shwa ïa ka Nongrim Hills, Nongthym -mai bad ka Ryntih. Katba ka Langsning bad ka Laitkor, ki la long kham jngai ban ïa ki bad ki la skhem ban ïai neh ha kane ka kyrdan.
U Risuk Malngiang u la pynkhih jar nyngkong eh lyngba ka penalty ha ka minit kaba 21 shwa ba u Samborwell Mynsong un thep ha ka minit kaba 23 na ka bynta ka Laitkor namar ba ka Rangdajied kam shym la long kaba phikir bha ïalade na ka bynta ban ailad ïa u Owanijuh Pajuh bad kumjuh ha ka bynta kaba shadien ka paw ka jinghiar kane ka kynhun ha ka rukol ïalehkai.
Ha kawei pat ka jingïakhun, ka Sawmer ka la pyrshang ban ïakhun tyngeh naduh kaba sdang, pynban kam shym la lah ban shan ha ka kylla miet ha kaba ka la shah thep haduh saw kol tang ha ki 16 minit. Kane ka la wan lyngba u Dauruhipaia (48′, 51′ & 61′) bad kawei pat na u Daohipaia Rymbai (49′). Ha shwa ban wai ka Langsning ka la thep biang sa shi kol lyngba u Lamgougin Khongsai (90′) na ka bynta ban jop shi syndon.
Ha ka Sngi Balang kan don tang kawei ka jingïalehkai hapdeng ka Nangkiew Irat SC pyrshah ïa ka Nongthymmai SC ha ka por 3 baje nohphai sngi.
