Shillong, Rymphang 23
Ka jingkhmih lynti ka Arsenal ban wanphai biang sha ka kyrdan ba hakhlieh kam shym la urlong hadien ba kane ka kynhun kaba la hap ban ïalehkai tang 10 ngut. ka la shah rem noh ha ka West Ham 1-0 kol ha ka sngi Saitjaiñ, katba ka Manchester United ka la ïasam mar shi point bad ka Everton hadien ba ki la ïakhaid mar 2-2 kol.
Kham hashwa ka Arsenal ka la ïoh ban lamkhmat ha kane ka lympung da kaba tam lyngba ka jingïapher ha ka jingthep kol lyngba ka jingjop ha Emirates Stadium, hynrei ka Liverpool ka la ïoh ban lamkhmat hadien ba la la jop ïa ka Wolves da 2-1 kol bad ïakhaid mar 2-2 kol pyrshah ïa ka Aston Villa.
Hynrei u Jarrod Bowen u la pynkhih jar na ka bynta ka West Ham ha ka minit kaba 44 jong ka kylla step, katba ka Arsenal ka la lah ban ïalehkai sa tang shiphew ngut na ka daw ka jingshah sei red card u Myles Lewis-Skelly. Te kumta kane ka dei ka jingshah rem kaba nyngkong na ki 16 sien ïakhun na ka bynta kane ka kynhun jong u Mikel Arteta.
Haba phai sha kawei pat ka jingïakhun ha Goodison Park, ka Everton ka la lah ban ïalehkai bha ha la ïing ha kaba tang hapoh shiteng kynta ka la ïoh ban thep ar kol lyngba u Beto (19) bad u Abdoulaye Doucoure (33).
Hynrei ka United ka la ïakhun tyngeh ha ka kylla miet ha kaba ka la lah ban pynphai kylla lyngba u Bruno Fernandes (72) bad kawei pat da u Manuel Ugarte (80) na ka bynta ban ïakhaid mar ar kol ha kaba kut ka jingïalehkai.
“Ngi la ïalehkai tang ha kawei ka kylla bad ngi la lah ban pynïakhaid ha kane ka jingïakhun. Hooid ngim shym la lah ban thep kol ha ka kylla step,” la pynpaw u manager ka United u Ruben Amorim hadien ba kane ka kynhun ka la don ha ka kyrdan ba 15 ha kaba ka la tang tang saw sien na ki 15 sien ïakhun.
