Guwahati, Rymphang:
Khyndiat sngi hadien ba u Lat ka jylla Manipur, u Ajay Kumar Bhalla, u la kyntu ïa ki paidbah jong katei ka jylla, kaba la don ha ki jingïakynad, ba kin aiti noh da ka mon sngewbha ïa ki tiar ïaleh ba la lute bad ba la bat beaiñ, ym duna ïa ka 15 tylli ki tiar siat, la aiti sha ki pulit ha ki lai tylli ki distrik, ong ki heh pulit ha ka sngi Ba-ar.
Saw tylli ki tiar siat, kynthup ïa kawei ka SMC Carbine kaba don ïa u Magazine bad kawei ka Double Barrel ryngkat bad lai tylli ki bom kawang kti, la aiti ha Singjamei Police Station ha Imphal West District, ong u heh sorkar.
Kawei ka suloi Self-Loading la aiti sha ki pulit ka Andro Police Station, katba san tylli ki suloi la aiti da ki briew ha Sagolmang PS ha Imphal East District.
Kawei ka pistol 9 mm bad ki kuli la aiti noh hakhmat ki pulit ka Heingang ha Imphal East District, katba saw tylli ki suloi la aiti sha ki pulit ha Churachandpur, ong uwei pat u heh sorkar.
U Bhalla u la kyntu ha ka 20 tarik u Rymphang ïa ki paidbah ban aiti mon sngewbha ïa ki tiar ba la lute bad ba la bat be-aiñ hapoh hynñiew sngi, da kaba pynthikna ba yn ym sdang kano-kano ka jingpynshitom pyrshah ïa kito kiba aiti ïa ki tiar ha kane ka por.
U Chief Secretary jong ka Manipur, u PK Singh, ha ka Sngi U Blei, u la ong ba ka por hynñiew sngi ba la ai na ka bynta ban aiti da ka mong lajong ïa ki tiar ialeh ba la lute bad ba la bat beaiñ, ka biang lada don kiba kwah ban aiti ïa ki tiar ïaleh, bad u la pynskhem ba ki shipai kin shim khia hadien ba la kut ka por ban ïoh biang ïa kum kine ki suloi.
Palat 250 ngut ki briew ki la shah pynïap bad da ki hajar ngut ki la sah khlem ïing khlem sem ha ka jingïakynad hapdeng ki jaitbynriew Meitei kiba shong ha Imphal Valley bad ki jaitbynriew Kuki-Zo kiba shong ha ki lum ba marjan naduh u bnai Jymmang, 2023.
Ka sorkar pdeng ka la pynjari ïa ka jingsynshar President ha Manipur ha ka 13 tarik u Rymphang, katto katne sngi hadien ba u Myntri Rangbah ka jylla N Biren Singh u la iehnoh ïa ka kam jong u kaba la wanrah ïa ka jingbym thikna ha ka saiñ hima sima ha kane ka jylla ka thaiñ Shatei-lam-Mihngi jong ka ri India.
