Shillong, Rymphang 25
Ka Shillong Lajong Foot-ball Club kan pynkhreh ïa ka jingïakhun shabar na la ïing ha ka lympung ïalehkai I-League pyrshah ïa ka Sporting Club Bengaluru ha ka Sngi Balang ha Banga-lore Football Stadium, Bengaluru ha ka por 4 baje nohphai sngi.
Kane kynhun ïalehkai na ka nongbah hapoh ka jingïalam u Jose Carlos Rodriguez Hevia ka la ïakhaid da 2-2 kol pyrshah ïa ka Dempo SC ha ka jingïalehkai ba la dep, hynrei ha kane ka jingïakhun ka la khmih lynti ban ïoh lai point na ka Bengaluru SCB kumba ka la lah ban pynliem ha la ïing haduh 5-0 kol.
Kumba ka long mynta ka Lajong ka dang ïai sah ha ka kyrdan basan ryngkat 23 poiñ na ki 15 sien ïakhun. Te kumta ka la khmih lynti ban ïalehkai bha khnang ba kan lah ban jam sha ka kyrdan balai ha kane ka lympung.
