Shillong, Rymphang 25
Ka Laitjem CC bad ka Friends United ki la long kiwei pat kiba la lah ban pynthikna ban jam sha ka semi final ha ka 4th District League T20 Cricket Tournament 2024 ba la pynïaid da ka East Khasi Hills Cricket Association hadien ba ki la ïoh jingjop ha ka Sngi Ba-ar.
Ha kane ka jingïakhun quarter final kaba la long ha madan Saitsohpen kaba ha Sohra, ka Laitjem ka la pynliem noh ïa ka Pomshutia CC da 9 wiket. Ka Laitjem kaba la jop kynting pisa, ka la ailad shwa ïa ka Pomshutia ba kan tied nyngkong ha kaba ka la ïoh 111 run bad shah pynkhyllem 6 wiket ha ki 20 over. U Felix Savio Kharsati u la tied 37 run na ki 52 bol. Katba u Doril june Pathaw u la shim 1 wiket ha ki 2 over na ka bynta ka Laitjem.
Haba wan shimti ïa ka pali ba ar, ka Laitjem ka la lah ban kynjoh sha ka thong da kaba ïoh 112 run bad shah pynkhyllem 1 wiket ha ki 13.5 over. Kane ka la wan urlong lyngba ka jingïalehkai bha u Marken B Kharkongor uba la lah ban khyrwit ïa ka shiteng spah kaba 50 run na ki 45 bol bad uba la ïohpdiang syndon ïa ka nam ‘Player of the Match’. Katba u Aristerwell u la shim 1 wiket ha ki 3 over na ka bynta ka Pomshutia.
Haba phai sha kawei pat ka jingïakhun ba ar, ka Friends United ka la jop da 2 wiket ïa ka Hurdles Mawsynram. Ka Hurdles Mawsynram kaba la kam trai ban tied nyngkong, ka la ïoh 119 run bad shah pynkhyllem 6 wiket ha ki 20 over. U Jonathan Pariong u la tied 28 run na ki 30 bol. Katba u Bryan Marbaniang u la shim 2 wiket ha ki 4 over na ka bynta ka Friends United.
Haba wan shimi ïa ka pali ba ar, ka Friends United ka la lah ban kynjoh sha ka thong da 120 run bad shah pynhap 8 wiket ha ki 19.5 over. U Nangkiewdor Moore Don u la tied 23 run na ki 18 bol. Katba u Shrimonto Hajong u la shim 2 wiket ha ki 4 over na ka bynta ka Hurdles Mawsynram. Ïa ka nam Player of the Match la ïohpdiang da u Bryan Mac Millan Marbaniang.
Na ka liang ki bor pynïaid ki la pynbna ba ka jingïakhun semi final kan long ha ka 27 tarik (sngi Palei) hapdeng ka Cricket Lovers pyrshah ïa ka Laitjem CC ha ka por 9 baje mynstep, katba ka Sohra Combine CC ïa ka Friends United CC ha ka por 12:30 mynsngi.
