Shillong, Rymphang 26
Ka Sawmer SC ka la pynkut ïa ka jingïalehkai jong ka Shillong Premier League 2024 da ka jingjop haduh shiteng donjon (6-0 kol) ïa ka Ryntih FC kaba don ha ka kyrdan shatrai, ha ka Sngi Balang ha SSA Stadium kaba ha First Ground, Polo.
Kane ka nam jop ka la wan urlong lyngba u Bickyson Kharkongor (49′ & 64′), Aibanraplang Dohling (52′), Rheadolf Nongneng Daloi (72′), Orestar Sad (78′) bad u Mebanjop Warjri (89′).
Kane ka jingjop ka la pynshong shngaiñ ïa ka Sawmer ban kan dang ïai sah ha kane ka kyrdan ïalehkai ha ka aïom ka ban wan namar ka Nong-thymmai SC bad ka Ryntih ki la thikna ban shah pynhiar kyrdan noh sha ka First Division wat la ki dangsah sa mar ar sien jingïakhun ban pyndep.
Ha kawei pat ka liang kane ka jingjop ka la pynkiew ruh ïa ka Sawmer sha ka kyrdan hynñiew ryngkat 18 poiñ bad ban tam ïa ka Nongrim Hills SC lyngba ka jingïapher kol. Hynrei ka Nongrim Hills ka dangsah sa ar tylli ki jingïalehkai ban pyndep.
Kumba ka paw ka Sawmer ka la pynkut ïa kane ka aïom ïalehkai da ki san tylli jingjop, ïakhaid lai sien bad shah rem shiphew sien.
