Shillong, Rymphang 26
Ka Sorkar Jylla ka la mynjur ban pynrung kam sorkar ïa ki nongïalehkai kiba la wanrah burom ïa ka Jylla da kaba khur takma ha ka National Games, South East Asian Games bad ha ka Olympics.
Ïa kane la pynbna da u Myntri Rangbah ka Jylla, Conrad K Sangma ha ka jingpynkup burom ïa ki nongking-lieng kiba la khur ïa ka takma ksiar, rupa bad ar tylli ki takma rnong ha ka 38th National Games kaba la long ha Uttara-khand, ha ka Sngi Balang ha State Convention Centre, Shillong.
Kine ki kynthup ïa u Vikash Rana uba la khur ïa ka takma ksiar ha ka kyrdan ïakob jong ka Extreme Slalom Kayak Cross, ka Elizabeth Vincent kaba la khur ïa ka takma rupa na ka Extreme Slalom Kayak Cross jong ki kynthei, katba u Indra Sharma bad u Pynshngaiñ Kurbah kiba la khur ïa ar tylli ki rnong ha ka Canoe Slalom.
Haba pynpaw ha kane ka sngi, u Myntri Rang-bah u la ïathuh ba kane ka jingmynjur ban thung kam sorkar ïa ki nongïalehkai ka dei ha ka jingïalang jong ka kynhun myntri kaba la long ha kane kajuh hi ka sngi. Ka jingthmu jong kane ka long ban pynshlur ïa ki nongïaleh-kai ba kin dang ïai trei shitom shuh shuh nangne shakhmat khamtam lei-lei ba ka Jylla kan pynlong ïa ka 39th National Games ha u snem 2027.
U la pynpaw ruh ba hapoh kine ar snem ka Sorkar ka la nang ïaid shakhmat ïa ki jingtei na ka bynta ki jaka ïalehkai bapher-bapher kiba don ha kane ka nongbah, kumjuh ha Jowai bad Tura. U la pynpaw ïa ka jingdonkam ban thung ïa ki coach kiba kynsai kiba lah ban ai jinghikai pura ïa ki nongïalehkai ka Jylla na ka bynta ban pynkhreh ïa katei ka National Games.
Ha kane kajuh hi ka sngi, la pynkup burom ruh ïa kiwei pat ki nongïa-lehkai kum ha ka Karate, Boxing, Athletics, Judo, Taekwondo, Football bad kiwei kiwei kiba la khur takma ha kiwei pat ki lympung kiba la ong ha u snem 2024.
Shuh shuh ha kane ka sngi na ka liang u Myntri Rangbah u la pyllait paidbah ruh ïa ka Meghalaya State Action Plan bad ka Chief Minister Football Mission.
