Imphal, Rymphang:
Baroh ki don 104 tylli ki tiar siat bad ki kuli kiba la aiti da ka mon sngewbha da ki paidbah ha ki hynriew tylli ki distrik ha Manipur kaba la don ka jingïakynad, la ïathuh ki pulit ha ka sngi Palei.
Ïa kine ki tiar ïaleh la pyndem ha Kangpokpi, Imphal East, Bishnupur, Thoubal, Imphal West bad Kakching distrik ha ka sngi Balang, shisngi shuwa ba ka por hynñiew sngi ba la ai da ki bor bahalor ban ai tiar siat kan kut noh, la ïathuh uwei u heh pulit.
U Lat ka jylla Manipur, u Ajay Kumar Bhalla, ha ka 20 tarik u Rymphang, u la kyntu ïa ki paidbah jong katei ka jylla, kaba la shah ktah ha ki jingïaleh, ba kin aiti mon sngewbha ïa ki tiar ïaleh ba la lute bad ba la bat beaiñ, hapoh kine ki sngi ba la buh, da kaba pynthikna ba yn ym sdang kano kano ka jingpynshitom ïa kito kiba aiti ïa ki tiar ha kane ka por.
U Chief Secretary u PK Singh u la ong ha ka 23 tarik u Rymphang ba ka por hynñiew sngi ba la ai na ka bynta ban aiti ïa ki tiar ïaleh ka biang lada don kiba kwah ban aiti ïa ki, bad u la pynskhem ba ki bor kin shim khia hadien ba la kut ka por ban ïoh biang ïa kum kine ki suloi.
Palat 250 ngut ki briew ki la shah pynïap bad da ki hajar ngut ki la sah khlem ïing khlem sem ha ka jingïakynad hapdeng ki Meiteis kiba shong ha ka them Imphal bad ki kynhun Kuki-Zo kiba shong ha ki lum ba marjan naduh u bnai Jymmang, 2023.
