Shillong, Rymphang 27
Ki ar kol ba la thep da u Gobindash Singh ki la biang pura ïa ka Nang-kiew Irat SC ban pynliem noh ïa ka Nongrim Hills SC da 4-0 kol ha ka Shillong Premier League 2024 kaba la long ha ka sngi Palei ha SSA Stadium kaba ha First Ground, Polo.
Kine baroh ki kol ki la wan ha ka kylla miet ha kaba u Gobindash u la thep ha ka minit kaba 46 & 72, katba ïa kiwei pat la pynbud da u Jefferson Pakynteiñ (79′) bad u Wallamsuk Nongkhlaw (90’+3).
Kane ka jingjop kam shym la kyntiew kyrdan ha kaba ka Nangkiew Irat ka la kamai 22 point na ka bynta ban don ha ka kyrdan ba 6 kata hadien ïa ka Laitkor SC, kaba la tam da shi point. Katba ka Nongrim Hills ka la ïai sah ha ka kyrdan ba phra.
U Gobin, u bym shym la thep kol ha ki jingïalehkai ba la lah, u la lah ban pynurlong na ka bynta ban thep ïa ka kol kaba nyngkong hadien ba u la mareh stet sha ka liang ka diang ha kaba u rangapkol ka Nongrim Hills u Kitboklang Marbaniang um shym la lah ban pyllait na ka jingshah thep. Une u rangïalehkai u la pynbud biang ïa ka kol kaba ar hadien ba u la lah ban pynpra ïa ki rangïalehkai ‘dien ka liang pyrshah.
Hadien katto katne minit u Jefferson u la ïoh ïa ka kabu kaba biang ban thep kol. Ïa ka kol kaba saw bad kaba khatduh la thep da u rangïalehkai shongben u Wallamsuk na ka bynta ban pynlong ïa ka Nangkiew ban khur syndon ïa ka jingjop.
Ka jingïalehkai ha ka sngi Thohdieng kan long hapdeng ka Shillong Lajong FC pyrshah ïa ka Langsning FC ha ka por 3 baje nohphai sngi. Ha ka jingïakhun ka wat kaba nyngkong ka Lajong ka la jop da 4-0 kol.
