Shillong, Rymphang 28
Ka lympung ïalehkai First Division Shillong Cricket League 2024-25 ba la pynïaid da ka Shillong Cricket Association ka la nangjam shaphrang ha kaba ka Khalsa Warriors ka la ïoh jingjop hadien ba la lah ban pynliem noh ïa ka Nongkseh CC da 5 wiket ha ka Sngi Thohdieng.
Ha kane ka jingïakhun ba la long ha madan Polo, ka Nongkseh ka la kam trai ban tied nyngkong ha kaba ka la ïoh 160 run bad shah pynhap 10 wiket ha ki 34 over. U Sandy Kharshandi u la tied 39 run na 42 bol bad u Banpynshngaiñ Dolloi u la ïoh 20 run na 46 bol. Katba ar ngut ki nongkawang bol ka Khalsa ba kynthup ïa u MD Siraj Ali bad u Kushaldeep Singh ki la shim mar 2 wiket.
Haba wan shimti ïa ka pali ba ar, ka Khalsa Warriors ka la lah ban kynjoh sha ka thong da kaba ïoh 163 run bad shah pynhap 5 wiket ha ki 36 over. Kane ka la wan lyngba ka jingïalehkai bha u MD Siraj Ali uba la lah ban khyrwit ïa ka shiteng spah kaba 73 run na 100 bol bad u Jay Shankar u la ïoh 36 run na 50 bol. Katba u Andlebert Shangpliang u la shim 2 wiket bad shi wiket da u Bushbashisha Tohtih. Ïa ka nam ‘Player of the Match’ la ïohpdiang da u MD Siraj uba la ïoh 73 run bad shim 2 wiket.
