Jowai, Rymphang 28
Ka Meghalaya Cricket Association (MCA) ka la pyntip ban kan seng ïa ka shlem ai jinghikai kriket ha East Jaiñtia Hills bad ka madan ai jinghikai ba kyrpang ha Jowai West Jaiñtia Hills kaba long ka sien jam kaba kongsan ban kyntiew ïa ka jingïa-lehkai kriket ki samla Rilum Jaiñtia.
Kane ka jingthmu ka dei kaba la lamkhmat da ka East Jaiñtia Hills Dis-trict Cricket Association bad ka West Jaiñtia Hills District Cricket Associa-tion na ka bynta ban pynbiang ïa ki jaka hikai kiba ïadei bad ka juk mynta ïa ki samla ïalehkai kriket.
Haba kren ha ka jingïalang ba nyngkong eh jong ka Apex Council ha Jowai ha ka 18 tarik mynta u bnai, u President ka MCA, Naba Bhatta-charjee, u la ong ba ka jingangnud jong ka MCA ka long ban kyntiew ïa ka jingïalehkai kriket naduh na tynrai.
U la pynpaw, “Kumba phi tip, ha ka kriket ne kino-kino ki jingïalehkai, kam don ka por shongthait. Ynda kut kawei ka aïom, ka jingpynkhreh na bynta kawei pat ka sdang mar-mar. Ngi la aiti ban kyntiew ïa ki sap hapoh shnong, bad kine ki jingsdang thymmai kin ai ka jinghikai kaba kongsan ïa ki samla kriket jong ngi.”
Ka MCA ka dang pynleit jingmut ha ka ban pynïar ïa ka jingïalehkai kriket ha kylleng ka Jylla. Ka MCA ka dang pynbiang ïa ki madan ha Nongstoiñ, Mendipathar, bad Mukhla ha West Jaiñtia Hills, ha kaba ka Mukhla la thmu ban pynlong jaka pdeng jong ka jingïalehkai kriket ba kongsan ha kine ar ne lai snem ban wan. Da ka jingkyrshan jong u MLA ka Jowai u Wailadmiki Shylla bad ka synjuk kriket jong ka West Jaiñtia District, kane ka projek ka thmu ban pynbiang ïa ki jaka ïalehkai kaba bha tam.
Ka Apex Council ka la pynskhem ruh ïa ki nongkitkam jong ka hadien ka ilekshon shiteng samoi kaba la pynlong katkum ka kyndon 15 jong ka riti synshar ka MCA na ka jingiehnoh-kam u secretary.
U Bah Rayonold Khar -kamni uba dei Vice-President u la shah jied kum u Honorary Secre-tary, katba u Sengnab Momin u la shah jied kum Vice-President bad u Bah Gideon Kharkongor kum Member Councillor. Kane ka jingjied nongkitkam ka la long ha ka 13 tarik mynta u bnai.
U Bhattacharjee u la ban jur ïa ka jingdonkam jong ki prokram ai jinghikai bad don ïa ki coach ba la pyntbit ha ki district. “Ym lah ban shu jied ïa u briew kum u coach. Ki hap ban sdang na ka kyrdan ‘O’, nangta kiew sha ka kyrdan ‘A’, bad khatduh sha ka kyrdan ‘B’. Ngi kwah ba man la ka distrik kan don la ki jong ki nonghikai ba la pyntbit namar ka jingïalehkai kriket ka dei ka technical games bad ka long kongsan bha ban ïoh ïa ka jinghikai naduh tynrai,” u la bynrap da kaba ong ba ka MCA ka la ai jingkyrshan pisa ruh sha ki distrik na ka bynta ki prokram ai jinghikai.
Ka MCA kan ïai bteng bad pyrshang ban pynbha ïa ki madan ïalehkai kriket ha kylleng ka Jylla. Ki madan ïalehkai ba thymmai kiba la sdang ban pynbha ka long ha Mawkyr -wat bad ha Nongstoiñ, ha kaba ka Nongkhrah ka la paw kum ka jaka ba kongsan na ka bynta ki jingïalehkai ha ka kyrdan Junior hadien ba ka la pynlong ïa ka lympung jong ka thaiñ shatei lammihngi.
