Agartala, Lber:
Ha ka jingkhynra kaba la long na ka jingwad bniah pyrshah ïa ki kam khappud beaiñ, ki bor pahara ki la kem ïa 13 ngut ki nong Bangladesh, kynthup ïa lai ngut ki shynrang, lai ngut ki kynthei, bad hynñiew ngut ki khynnah, ryngkat bad lai ngut ki nongïarap kiba dei ki nong India ha ka thaiñ khappud jong ka Kailashahar kaba hap hapoh ka distrik Unakoti ha ka 27 tarik, Rymphang.
Katkum ka jingïathuh jong ki heh sorkar, kine ki nong Bangladesh ki dei kiba wan na Moulvibazar, Sunamganj, Netrakona, bad Barisal distrik jong ka Ri Bangladesh. Kine ki nongïarap jong ka ri India la ithuh kum u Kajal Das na Silchar (Assam), u Ajit Das na Unakoti (Tripura), bad u Prasanjit Debnath na Dhalai (Tripura).
Ha ka jingbteng ban pyntroiñ ïa ki kam be-aiñ ha ki bynta khappud, la pynlong ïa ka jingïatreilang bad ki pulit ka Government Railway Police (GRP) ha ka jaka sangeh rel ha Agartala ha ka miet ba hapdeng jong ka 27-28 tarik, Rymphang. Kane ka la pynlong ban ïohkem sa arngut ki nong India kiba donkti ban pynsuk ïa ka jingrung khlem jingbit jong ki nong Bangladesh kiba wan buhai shnong sha ki jaka jong ka ri India.
Nalor kata, ha ka 27 tarik, Rymphang, ka jingkhynra kaba kyrpang ha ka jingïatreilang bad ki pulit ka Tripura ka la pynlong ïa ka jingkem ïa ar ngut ki nong Bangladesh hajan ka jaka rim jong ka ONGC katba ki dang pyrshang ban ïaid lyngba biang sha Bangladesh.
“Ki BSF ki dang ïai bteng ban pynneh ïa ka jingpyntreikam ban ym map pyrshah ïa ka jingkyntur pud be-aiñ, ka jingkhaïi briew, bad ki kam khaïi tuh ha shilynter ka khappud Indo-Bangladesh. Kum kine ki jingtreikam kin dang ïai bteng ban pynthikna ïa ka jinglong ba janai jong ki khappud jong ngi,” ong u nongaiktien jong ki BSF.
