Vatican, Lber:
Katkum ki khubor, la ong ba u Pope Francis un ym lah ban pynsngew ia ka jingduwai Angelus tynrai jong u na ka bynta ka taiew kaba lai lynter, ha kaba ka Vatican ka la pynmih ia ki jingthoh ba la thoh da u ha ka jaka jong ka.
Ka Vatican, ka ong ba ia katei ka jingthoh, kaba la phah na ka kamra hospital jong u ha Rome, la thoh ha ki khyndiat sngi ba la dep. U Pope u la ai khublei ruh ia ki briew na ka bynta ki jingduwai jong ki bad u la ai khublei ia ka kynhun sumar jong u, kaba la trei shitom ban pynkoit bad pynim ia u haduh kane ka kynti.
U Pope u la ong ha ki paid riewngeit Katholik ha kylleng ka pyrthei ba u sngewnguh ia ka jingieid bad jingsngewjan jong ki na ka bynta jong u.
Ha ka step Sngi U Blei, katkum ka khubor jong ka Vatican, u Pope u la kyndit hadien ka jing-iohthiah lyngngai bad u la bam ja miet ryngkat bad ka ‘Coffee’ bad hadien kata la ioh ban bteng biang ia ka jingsumar jong u bad u la pule ia ki kot khubor kumba u ju leh man ka sngi.
U Pope u la pdiang ïa 2 ngut ki nongwan jngoh ha Gemelli hospital ha ka Sngi U Blei – ki nongwan jngoh ba nyngkong eh kiba nabar kiba ka Vatican ka la kdew naduh ka Sngi Nyngkong ba la dep.
Sa shisien pat, dei u Secretary of State jong ka Vatican, u Cardinal Parolin bad u nongiarap jong u, u Monsignor Pena Parra, kiba la leit jngoh ia u Pope Francis ha ka kamra hospital jong u kaba don ha mala kaba shiphew. Hynrei ym shym la pynshai bniah haduh katno por ki la ioh ban ia shongkai bad u ne kaei kaba ki la iakren ha katei ka jingleit jngoh jong ki ia u Pope hapoh ka jaka thiah pang jong u ha katei ka hospital.
