Shillong, Lber 04
Ki nongking-lieng ka Jylla ki la pynpaw ka jingkmen halor ka jingïohpdiang ka Jylla Meghalaya ban pynlong ïa ka 39th National Games ka ban long ha u snem 2027 bad ki la khmih lynti ba kin ïalehkai bha na ka bynta ban khur ïa ki takma ksiar ha kane ka lympung baheh duh jong ka ri.
Ha ka 38th National Games kaba la kut dangshen ha Uttarakhand, ka Jylla ka la lah ban khur kawei ka takma ksiar bad rupa lem bad lai tylli ki takma rnong. Kane ka long ka sien nyngkong ha ki 14 snem naduh ba ka Jylla ka la leit ïashim bynta ha katei ka lympung.
Wat la ka Jylla ka la phah haduh 43 ngut ki nongïalehkai ha ki khyndai tylli ki jait jingïa-lehkai, hynrei dei tang ki nongking-lieng kiba la lah ban wanrah burom ïa ka jylla. Kine ki kynthup ïa u Vikash Rana uba la khur ïa ka takma ksiar ha ka kyrdan ïakob jong ka Extreme Slalom Kayak Cross, ka Elizabeth Vin-cent kaba la khur ïa ka takma rupa na ka Extreme Slalom Kayak Cross jong ki kynthei, katba u Pynshngaiñ Kurbah lem bad u Indra Sharma ki la khur ïa ka takma rupa ha ka Canoe Slalom. Katba ïa kawei pat ka takma rnong la khur da ar ngut ki nongking-lieng jong ka Rowing Association kata ka Kiran Devi bad ka B. Anandhi Bronze ha ka Lightweight Women’s Double Sculls.
Haba ïakren bad ki nongthoh khubor ha ka taïew ba la lah hadien ba ki la shah pynkup burom ha ka tnat ïalehkai jong ka Sorkar Jylla, kitei ki nongïalehkai kiba kynthup ïa u Pynshngaiñ, Elizabeth, Indra lem bad u Vikash ki la pynpaw ïa ka jingkmen halor ki jinglah jong ki ban ïalehkai bha ha katei ka lympung kat haduh ba kin da lah khur takma ïa ka Jylla. Te kumta ki la pynpaw ïa ka jingkhmih lynti ba kin ïalehkai bha sa ha ka 39th National Games bad ban pynurlong ïa ka takma ksiar na ka bynta ka Jylla hi baroh kawei.
“Ha ka jingshisha ngam shym la ïoh por bha ban pynkhreh namar nga hap ban leit trei bad i pa sha khlaw bad nga la wan ïing haduh da la kem dum, hynrei nga la ïoh tang khyndiat ka por ban pynkhreh,” la pynpaw u Pynshngaiñ.
“Ka jingsdang ha ka jingïalehkai king-lieng ka dei lyngba ka jingleit ñiah myllen bad uwei u paralok, hynrei hadien ba u coach u la ïohi ïa nga u la phah wan ban kilanmet tista. Bun kiba ong ba kane ka jingïalehkai ka bym shngaiñ, hynrei ngam shym la pynsngap ïa ki namar nga thrang na lade ban ïalehkai khlem da pynbor mano-mano bad mynta la phra snem nga la pynleit jingmut ha kane ka jingñiah lieng.”
“Wat la nga la khur ïa ka takma rnong ha Uttarakhand, hynrei nga khmih lynti ba nangne shakhmat ngan trei shitom na ka bynta ban khur ïa ka takma ksiar ha ka National Games ka ban long ha ka Jylla jong ngi.
Kumjuh, ka Elizabeth ka la pynpaw ba ka la trei shitom na ka bynta katei ka lympung kaba la long ha Uttarakhand. “Nga sngewkmen eh ba nga la lah ban ïalehkai bha ha katei ka lympung namar ha ka 37th National Games kaba la long ha Goa ngam shym la lah ban khur takma. Te kumta ngan dang ïai pyrshang ban trei shitom na ka bynta ban khur sa ïa ka takma ksiar ha ka 39th National Games ka ban long ha Meghalaya.”
U Indra Sharma u la pynpaw ba u la trei shitom bha ïalade namar ba u hap ban pyndep ïa ki kam ha ïing bad leit skul. “3:30 mynstep nga la khie thiah, ha kaba nga la pule kot haduh 5 baje. Hadien nga leit king-lieng ban kilanmet ïalade bad nga wanphai pat sha ïing ban pynkhreh ïa ka jingleit skul. Hadien ba la wan skul, nga leit lehkai gym ban pynkhlaiñ ïalade ha ka bor met namar ka king-lieng ka donkam ïa ka jingkhlaiñ ha ka bor met. Hadien ba la wanphai sha la ïing, nga pyndep ïa ki kam ïing bad ka jingkhreh kot.”
“Ka thong ka jong nga mynta ka long ban khur ïa ka takma ksiar ha ka 39th National Games bad nangne shakhmat ngan ïai trei shitom ban pynkhreh ïalade,” u la bynrap.
Katba u Vikash u la pynpaw ba un dang ïai trei shitom nangne shakhmat ban pynkhreh ïa katei ka lympung ka ban long ha ka Jylla ha u snem 2027. “Ka dei ka sien ba ar ïa nga ban ïashim bynta ha ka National Games, kaba nyngkong ka dei ha Goa bad kaba ar ka dei ha Uttarakhand kaba nga la lah ban khur ïa ka takma ksiar.
Ha kawei pat ka liang u coach katei ka kynhun ki nongking-lieng, Ian Vin-cent, u la pynpaw ka jing-ïaroh ïa ka jingdon ka Wah Umtham namar ka long kaba kham biang ban ïa kiwei ki wah kiba don ha kylleng jong ka ri India.
U la pynpaw ba ki la don bun ki nongïalehkai na kylleng jong ka ri kiba la wan ban pyrshang ha katei ka wah. “Kumba ka long mynta ngi donkam ïa ki khynnah kiba don ïa kane ka sap king-lieng ha ka rta kaba 13 bad 14 snem ban ai jinghikai ïa ki namar ki la don tang katto-katne ngut ki khynnah na ka thaiñ Umtham kiba ïashim bynta ha kane ka jingïakob king-lieng.”
