Shillong, Lber 04
Ka Sputnik Cricket Club ka la ïoh jingjop ha ka Super Division Shillong Cricket League 2024-25 hadien ba pynliem noh ïa ka United XI da 5 wiket ha ka Sngi Ba-ar.
Kane ka nam jop ka la wan urlong lyngba ka jingïalehkai bha u Gurinder Singh uba la shim 3 wiket lem bad ar ngut ki nongtied kata u Amiangshu Sen bad u Asif Khan kiba la lah ban khyrwit ïa ki shiteng spah run.
Haba wan shimti ïa ka pali ba ar kaba la long ha madan Polo, u Amiangshu u la ïoh 73 run na 79 bol bad u Asif u la ïoh 64 run na 65 bol na ka bynta ban pynlong ïa ka Sputnik ban kynjoh sha ka thong hadien ba ka la lah ban tied 274 run bad shah pynkhyllem 5 wiket ha ki 42 over.
Kham shwa ka United kaba la shimti ban tied nyngkong, ka la ïoh 273 run bad shah pynhap 4 wiket ha ki 45 over. Wat la u Yogesh Tiwari u la lah ban khyrwit ïa ka spah run kaba 132 na 114 bol lem bad u Jason J. Lamare uba la ïoh 75 run na 71 bol, hynrei kim shym la lah ban pynurlong ïa ka jingjop. Katba ki nongkawang bol ka Sputnik kata u Gurinder u la shim 3 wiket bad 1 wiket na u Mark Ingty.
Ha kawei pat ka liang ki nongkawang bol ka United, u Abir Chakraborty bad u Navin Kumar Roy ki la shim mar 2 wiket. Ïa ka nam ‘Player of the Match’ la ïohpdiang da u Gurinder Singh.
