Shillong, Lber 04
Ka Nottingham Forest ka la lah ban pynthikna ban jam sha ka quarter final ha ka FA Cup, hadien ba ka la lah ban pynliem noh ïa ka Ipswich Town lyngba ka tie-breaker da 5-4 kol ha ka Sngi Ba-ar ha City Ground.
U Jack Taylor u dei tang ma u kum nongïalehkai bym shym la lah ban thep kol hadien ba u rangapkol Matz Sels u la lah ban pyllait na ka jingshah thep bad ban pynlong ïa ka Forest ban tam da 5-4 kol bad ban pynkhreh ïa ka jingïakhun quarter final ha Brighton.
Baroh arliang mamla, kitei ki kynhun kiba la ïapher haduh 15 kyrdan bad 31 poiñ ha ka Premier League, hynrei da ka jingthmu ba kongsan jong ka Forest ka long ban ïoh rung sha ka Champions League ha ka samoi ïalehkai ka ban wan, te kumta u Nuno Espirito Santo u la pynshongthait katto-katne ngut ki rangïalehkai ba kongsan jong u.
Wat la kine ki kynhun kim shym la lah ban thep kol ha ka kylla step, hynrei ka Ipswich ka la ïoh ban pynkhih jar nyngkong eh lyngba u George Hirst ha ka minit kaba 53 jong ka kylla miet. Te kumta u Ryan Yates (68) u la lah ban pynïakhaid kylla na ka bynta ka Forest.
Kumta haba bteng biang ïa ka jingïakhun jong ka extra time kaba 30 minit, kine ki kynhun kim shym la lah ban thep kol. Dei tat haduh ka tie-breaker ba ka Forest ka la lah ban pynurlong ïa ka jingjop.
“Ha ka penalty uwei na ki nongap kol u la kylla long u riewshlur”, la ong u Sels.
“Nga sngewkmen ba nga lah ban ïarap ïa ka kynhun ban jam sha kawei pat ka jingïakhun kaba bud. Ka dei tang ka penalty kaba nga la don ha ka liang kadiang!”
