Kyiv, Lber:
U President ka Ukraine, u Volodymyr Zelensky, ha ki khyndiat sngi ba la leit, u la pynbna ba u kloi ban hiar shuki noh na ka kyrdan President lada ka NATO ka kular ban pynrung ia ka Ukraine hapoh ka kynhun jong ka na ka bynta ka jingshngaiñ jong ka Ukraine hadien-habud.
Namar la ong ba u Zelensky, u la shah kynthoh jur ha ka sorkar ba thymmai jong ka US- hapoh ka jingialam jong u President ba thymmai ka US- u Donald Trump bad u la ong ba u kwah ban iakynduh ia u Trump ha shwa ba u Trump un leit ban kynduh ia u President ka Russia- u Vladimir Putin.
U Zelensky, u ju khot ia ka Ukraine, ba dei ban ai ia ka jinglong dkhot jong ka NATO, kum shi bynta jong kano-kano ka jingiateh, na ka bynta ban pynkut noh ia katei ka thma. Hynrei katei ka kynhun synrop kaba la ialam da ka Washington, ka kynran dien ban ai ia ka jingkular.
Kumta u la ong “Lada don jingkyrmen ia ka jingsuk-jingshngaiñ na bynta ka Ukraine, lada phi donkam shisha ïa nga ban mih noh na ka kam jong nga, nga long uba la pynkhreh, nga kloi ban ieh noh ia ka shuki President ban ia bujli ïa ka rai ban pynrung ia ka ri hapoh jong ka NATO.”
U Zelensky bad u Trump, ki la don ha ka thma ‘nia naduh ba ki heh jong ka US bad Russia, ki la ïakynduh ha ka taiew ba la dep ha Saudi Arabia, na ka bynta ka jingïakren ba ha khlieh duh ba nyng-kong jong ki, hadien lai snem.
Ha ki jingkynthoh ba bun jait ha ka taiew ba ladep, u Trump u la jer kyrteng ïa u Zelensky kum u “nongsynshar donbor”, u la kynnoh lamler ba ka Ukraine ka la “sdang” ïa ka thma bad u la ong, pyrshah ïa ki jingwad bniah ba laitluid, ba u Zelensky um long uba sngewtynnad ha la ïing.
U Zelensky u la ong ba um shym la “sngewsih” ia ki jingkren jong u Trump bad u long uba la khreh ban tynjuh ia ka jingdon burom jong u ha ki elekshon shisien ba ka ain shipai ka la kut ha Ukraine.
Utei u nongialam jong ka Ukraine, u la khot ruh ia u Trump, ba un iakynduh ia u, ha shwa ba un leit ban iakren ne iakynduh ia u Putin. U la bynrap ba ka la don ka jingseisoh ha ka jingiateh ban ailad ia ka America ban ioh kham bha ia ki marpoh khyndew kiba kongsan jong ka Ukraine.
