Shillong, Lber 05
U Myntri Rangbah uba khmih ruh ïa ka tnad pla tyngka ka Sorkar Jylla, Conrad K Sangma, haba wanrah ïa ka mang tyngka ha ka ïing dorbar thaw aiñ ha ka Sngi Balang, u la pyntip ba ha kine ki lai snem ban sa wan, ka sorkar ka thmu ba kan pynlut haduh kumba T.1,900 klur bad kane kan kynthup lang ïa ka jingpynlut ha kaba ïadei bad ka jingpynkhreh ban pynlong ïa ka National Games kaba 39, ka ban long hangne hapoh ka jylla ha u snem 2027.
Haba wanrah ïa kane ka mang tyngka na ka liang u Myntri Rangbah u la kam ba naduh u snem 2018, kumba T.1,500 klur na ka pla tyngka jong ka jylla la lah ban pynlut ha ka ban tei ïa ki jaka ïalehkai, kaba long tang kumba T.100 klur naduh u snem 2001 haduh u 2018.
Shuh shuh u Myntri Rangbah u la pyntip ruh ba na ka liang ka sorkar ka la lah ban pynlong ym duna ïa 10 tylli ki lympung ïalehkai bar ri (international sports events) kum ka Indian Super League (ISL), ka Durand Cup, Elite Men’s Boxing Championship, ka ICF World Cup Qualifiers for India.
Nalor katta, u la pynpaw ïa ka jingsngew sarong ba ha ka 38th National Games kaba dang shu dep shen, kum ka jylla ka la lah ba kan thaw ïa la ka rekod hadien ba kan ïoh ban khur haduh 5 tylli ki takma na kane ka lympung.
Haba phai sha ka lympung ïalehkai jong ka 39th National Games ka ban sa long ha ka jylla ha u snem 2027, u Myntri Rangbah u la ong ba kane kan long ka burom kaba khraw ban ïoh pynlong ïa kane ka lympung, kaba la wan hadien ka jingïatan tyllai kaba jur bad shyrkhei bha bad kiwei pat ki jylla kum ka Chhattisgarh bad Assam.
U Myntri Rangbah u la pyntip ruh ba ka jingthmu jong kane ka mang tyngka ka long ban pynlut haduh T.732 klur na ka bynta ka Mawkhanu Football Complex, ka ban ngiam kumba 40 hajar ngut ki nongpeitkai.
“Sa kumba 25 tylli ki madan ‘artificial turf’ bad 140 tylli ki ‘grassroot centers’ bad ka jingbhah pisa ba kyrpang sha ki klob ïalehkai, kine ki dei ki thong kiba ka sorkar ka la buh hakhmat mynta, khlem da klet ruh ïa ka jingbhah kaba T.10 klur na ka bynta ka CM’s Football Mission,” u la ong.
Shuh shuh ha kane ka mang tyngka ba mynta ka sorkar kan bteng ïa ka bhah pisa kaba kynjoh sha ka T. 236 klur khnang ban lah ha ka ban pyndep ïa ka jingtei ïa ka J.N. Stadium ha Polo, Shillong, ka P.A. Sangma Sports Complex ha Tura, ka Ampati Stadium bad ka Jongksha Indoor Stadium ïa kaba yn bynrap lang ruh bad sa kiwei-kiwei pat ki jingtei bathymmai na ka bynta u snem 2025-26.
U Myntri Rangbah u la pyntip ba dang shen ka sorkar jylla ka la rai ba kan pyntreikam noh ïa ka Meghalaya Outstanding Sports Persons Direct Appointment Policy, ka ban long kum ka lad ban ai kam ai jam ïa ki khun samla ka jylla kiba la ïoh ban khur ïa ki takma ki jong ki na ki rynsan ne lympung ïalehkai bar ri ba la ithuh bad pdiang da ka International Olympic Committee (IOC).
