Shillong, Lber 05
U MDC barim ka Mawkyrwat, Bah Carnes Sohshang ha ka Lah Sngi U Blei u la ïoh ban lum ban lang ïa ki khun samla jong ka shnong Rangdkhew bad ïa ka Sports Club na ka bynta ban aiti ban pyntrei bad pynïaid ïa ka Madan Futsal ha ka shnong Rangdkhew kaba ha South West Khasi Hills District.
Ïa kane ka madan la mang pisa ha ka jinglut kaba T. 50 lak tyngka na ka skhim kyrpang lyngba ka Khasi Hills Autonomous District Council.
Na ka liang ki samla jong kane ka thaiñ ki la pynpaw ka jingsngewnguh kaba khraw ïa u Bah Carnes uba la lah ban wanrah ïa kane ka Madan Futsal kaba kim pat ju ïohi mynno-mynno bad ïohsngew tang na ki briew hynrei mynta ki la ïoh la ka jong ka madan hapoh ka shnong.
U Bah Sohshang haba ai jingkren ha kane ka sngi, u la pynpaw ka jingsngewkmen kaba khraw namar wat ha i bor barit u la lah ban wanrah ïa kane ka madan Futsal hapoh kane ka thaiñ kaba dei ka thaiñ kaba dang donkam shibun ban kyntiew ïa ka kam ïalehkai bad kaba dei ruh ka dong ka thaiñ kaba dang sahdien hapoh ka Mawkyrwat Konstitwensi.
U la ong ruh ba wat u la shah rem ha kane ka ilekshon MDC ba dang shu dep, hynrei na ka liang jong u, un dang ïai trei shitom katba lah ban wanrah ïa ki kam pynroi hapoh kane ka dong ka thaiñ.
