Washington, Lber:
U President jong ka US, Donald Trump, ha ka Sngi Balang u la byrngem ban pynjot shuh shuh ïa ka Gaza lada ka Hamas kam pyllait lut noh ïa baroh ki nongshah rahbor na Israel kiba dang sah ha ka kti jong ka bad u la pynmih ruh ïa ka jingbthah ïa ki nongïalam ka Hamas, ba kin phet krad noh na Gaza lada ki kwah ban lait na kita baroh.
Da kaba kyrshan jur ïa ka Israel katba ka jingsangeh thma ba shipor ka dang treikam, u Trump u la ong ba un phah ia ki jingdonkam baroh kat kiba ka Israel ka donkam ban ban pyndep ïa ka kam kaba sah bad kane ka long ruh katba ka sorkar jong u ka dang ialeh ban pynkloi ban phah ïa ki tiar ïakhun kiba da ki klur tyngka.
Namarkata, u Trump ha katei ka sngi u la byrngem tyngeh ia ka Hamas bad ong ba ka dei ban pyllait lut noh shi syndon ia baroh ki briew jong ka Israel baroh kat kiba dang sah ha ka kti jong ka bad ban pynphai noh ruh ia baroh ki metiap jong kito ki nong Israel kiba la khlad ha ka kti jong ka. Bad u la maham jur ruh ba lada ka Hamas kam leh ia kiei ba la bthah, kan hap ban mad ia ka jingjynjar bad ka jingpynjot ha ka Israel ryngkat ka jingkyrshan radbah jong ka United States.
Kumta ruh u Trump u la ong ba kane kan long ka jingmaham kaba khatduh na bynta jong ka Hamas, hynrei lada ka Hamas kam lah ban leh ia kaba la kyntu da ka US, ka Hamas kan ym don jaka phetrieh ne kan ym don shuh tang uwei ruh u ban lait-im lada ka US ka la aibor bad ai jingkyrshan ia ka Israel ba kan pynhiar kput ia ka.
U Trump u la pynshai ruh ba kan don ka jingktah ïa ka Gaza baroh kawei, ha kaba la jan baroh ki nongshong shnong ki la shah pynkynriah jaka namar ka jingïakhih shipai kaba khlem sangeh jong ka Israel kum ka jingpynrem ïa ki jingshah thombor jong ka Hamas ha ka 7 tarik u Risaw jong u snem 2023.
Kane ka jingkren jong u ka long hadien ka jingmaham jong u Benjamin Netanyahu, Myntri Rangbah duh jong ka Israel, halor ki “jingjia kiba phim lah ban mutdur” lada ka Hamas kam aiti ïa ki nongshah rahbor kiba dang sah kiba la shah kem ha ka 7 tarik u Lber.
Ka bynta ba nyng-kong jong ka jingsangeh thma ka la kut noh ha ka taiew ba kut hadien hynriew taiew jong ka jingsuk kaba kynthup ïa ka jingïakylliang ïa ki koidi Israel bad ki koidi Palestine kiba la set ha ki patok Israel.
Katba ka Israel ka la ong ba ka kwah ban pynjlan ia ka bynta kaba nyngkong haduh ka shiteng jong u bnai Risaw, ka Hamas ka la iai ban ban pynkylla sha ka bynta kaba ar, kaba dei ban ialam sha ka jingpynkut noh shi syndon ia ka thma.
Hynrei ka Israel ka la pynjur ïa ka jingpynbor ym tang da ki jingbyrngem da kaba pynsangeh lut ïa ka jing-rung jong ki mar bad ki jingpynbiang sha Gaza, da kaba pynthymmai ïa ka rukom treikam kaba eh kaba ka sorkar barim jong ka US jong u Joe Biden ka la pyrshah.
Kumjuh ruh la ong ba ka France, ka Britain bad ka Germany, ha ka Sngi Balang, ki la pynpaw ka jingsngew khia kaba jur halor ka jinglong-jingman jong ki paid nongshong shnong ka nongbah Gaza bad ki la kyntu ruh ia ka Israel, ba kan pyntikna ia ka jingpynpoi ia ki jingïarap kiba dei ban poi sha ki paidbah nongshnong shnong ka Gaza, khlem da buh kyndon ne khang ia ki lad jingïarap ba la pynpoi da ki tnat bad ki ri bapher jong ka pyrthei.
