Shillong, Lber 06
Ka Nongrim Hills SC ka la wanphai da kaba khlaiñ bor ban pynliem ïa ka Ryntih FC da 6-2 kol ha ka OC Blue Shillong Premier League 2024 ha ka Sngi Palei ha SSA Stadium kaba ha First Ground, Polo.
U Caldolan Kharmaw -phlang (15′) u la pynkhih jar nyngkong na ka bynta ka Nongrim Hills, hynrei ka Ryntih ka la lah ban pynphai kylla ar kol ha ka kylla step lyngba u Wanshanlang Dkhar (21′) bad u Basuklang Bina (28′). Sa shisien pat ka Ryntih kam shym la lah ban shan ha ka jingïakhun jong ka kylla miet ha kaba ka la shah thep biang sa san kol lyngba u Onyxson Buhroy (66′), Oresterwell Langshiang (71′, 78′), Mebanshan Suting (74′) bad u Banshemphang Kurbah (85′) na ka bynta ban pynurlong ïa ka Nongrim Hills ban ïoh lai point.
Kane ka long ka jingïakhun kaba khadduh na ka bynta kine baroh arliang mamla. Kane ka jingjop ka la kyntiew shi kyrdan ïa ka Nongrim Hills sha kaba hynñiew bad ka Sawmer SC ka la hiar sha kyrdan kaba phra. Ka Ryntih, kaba la dep ban pynthikna ban shah pynhiar kyrdan noh na kane ka lympung hadien ba ka la ïai sah ha ka kyrdan ba shatrai, ka la mad ïa ka jingshah rem kaba 16 sien ha ka SPL mynta ka aïom.
Ka jingïalehkai ha ka Sngi Thohdieng kan long hapdeng ka Laitkor SC pyrshah ïa ka Nangkiew Irat SC ha ka por 1:45 janmiet. Ka Laitkor ka la jop da 2-0 kol ha ka wat kaba nyngkong kaba la long ha ka 23 tarik u Risaw mynshem snem.
