Shillong, Lber 06
Ka Shillong Lajong kan ïakhun pyrshah ïa ka kynhun kaba khlaiñ bor na Goa, ka Churchill Brothers ha ka lympung ïalehkai I-League ka ban long mynta ka Sngi Thohdieng ha ka por 7 baje janmiet ha Football Stadium kaba ha Raia, Goa.
Kane ka jingïakhun shabar na la ïing ka dei kaba kongsan na ka bynta ka Lajong hapoh ka jingïalam u Jose Carlos Rodriguez Hevia khnang ba kan nangjam shaphrang ha kane ka lympung.
Kumba ka long mynta ka Churchill Brothers ka dang dei ka kynhun kaba dang lamkhmat ha kane ka lympung wat la ka ïaryngkat mar 31 point bad ka Inter Kashi, kaba don ha ka kyrdan ba-ar. Katba ka Lajong (26 point) ka don ha ka kyrdan basaw bad ka dang duna sa 5 point ïa katei ka kynhun na Goa.
Ha ka jingïalehkai ba la lah, ka Lajong ka la pynliem ïa ka Gokulam Kerala da 4-3 kol, katba ka Churchill Brothers ka la jop da 3-1 kol ïa ka Rajasthan FC.
Lah ban kdew ha ka jingïalehkai ha la ïing kaba la long ha kane ka nongbah ha ka 24 tarik u Naiwieng 2024, kitei ki kynhun ki la ïakhaid mar 2-2 kol. Kumta la khmih lynti ba kane ka jingïakhun kan long kaba kham itynnad na ka bynta ban ïaknieh ïa ki lai point.
