Shillong, Lber 07
Ka East Khasi Hills Cricket Association kan pynlong sa ka lympung ïalehkai kriket na ka bynta ki shakri sorkar ba la tip kum ka Inter Office Cum Corporate League T20 Cricket Tournament 2025 naduh 10 tarik mynta u bnai ha madan Pynshadkhurai kaba ha Saitsohpen, Sohra.
Ha kane ka lympung ki don 10 tylli ki kynhun ha kaba la phiah sha ar tylli ki group. Ha ka Group – A ki long ka NIT Meghalaya, Telecom Combine, MLP, Sohra, PHE Sohra Division bad ka Exporter XI, katba ha ka Group-B ki long ka Ri-Bhoi Office Combine, Sohra Post Office, Combine SHG, SSA Shella Bholaganj bad ka Sohra Labour Union.
Ki kynhun ban ïakhun ha katei ka sngi sdang ka 10 tarik kin long hapdeng ka NIT, Meghalaya pyrshah ïa ka Telecom Combine ha ka por 9 baje mynstep bad ka Ri-Bhoi Office Combine ïa ka Sohra Post Office ha ka por 12:30 mynsngi.
Katkum ki prokram la ong ba ki ar tylli kynhun ki ban wan ha ki kyrdan ba ha khlieh na kitei ar tylli ki group kin ïoh rung sha ka semi final ka ban long ha ka 28 tarik bad ka final ha ka 31 tarik.
