Jem khnap ka SLFC ha ka Churchill Brothers, shah sei red card 3 ngut ki rangïalehkai

Shillong, Lber 07

Kan dei ka jingïalehkai kaba sniew tam ïa ka Shillong Lajong FC kaba la hap ban ïalehkai sa tang phra ngut ki rangïalehkai kumjuh ban mad ïa ka jingshah rem ha ka Churchill Brothers da 6-1 kol ha ka Sngi Thohdieng ha Raia, Goa.

Kane ka jingshah pynduna rangïalehkai sha ka phra ngut ka dei na ka daw ka jingshah sei red card jong lai ngut ki rangïalehkai, kita u Kenstar Kharshong (49′), Renan Paulino (54′) bad u Marcos Rudwere Genar Silva (90+2′).

U rangïalehkai ka Churchill na Colombia u Sebastian Gutierrez u la long uba kynsai ha kane ka lympung hadien ba u la ïoh ïa ka hat-trick ha kane ka lympung.

Wat la ki la ïakhaid mar 2-2 kol mynshem snem ha kane ka nongbah, pynban ha kane ka jingïa-khun ka la long khongpong namar ka jingbym lah ban ïalehkai bha ka SLFC, katba katei ka kynhun na Goa ka la lah ban pynpaw ïa ka jingtbit na ka bynta ban ïai bteng ban bat ïa ka kyrdan halor duh.

Ka Lajong ka la pynkhihjar nyngkong ha ka minit kaba 27 lyngba u Marcos Rudwere shwa ba un shah beh noh madan shwa ban wai ka jingïakhun. Haduh kaba kut jong ka kylla step ka Lajong ka dang tam ïa ka Churchill.

Hadien ba la bteng biang ïa ka jingïakhun jong ka kylla miet ba ka Churchill Brothers ka la lah ban pynïakhaid kylla lyngba ka penalty ba la shut da u Pape Gassama (50′). U Sebastian u la ïoh ïa katei ka hat-trick hadien ba u la ïoh ban thep lai kol (52′, 66′ & 78′).

Katei ka kynhun na Goa ka la ïoh ei shi kol na ka daw ka jingbakla thep hi da u rangïalehkai ka Lajong u Ranit Sarkar (73′) bad ha shwa ban wai ka la thep biang sa shi kol lyngba ka penalty ba la shut da u Wayde Lekay (90+3′) na ka bynta ban ïoh jingjop shisyndon.

Lyngba kane nam jop ka Churchill Brothers ka la don 34 poiñ na 19 sien ïakhun hadien ba ka la lah ban tam biang lyngba ka goal average ïa ka Inter Kashi kaba la jop da 3-2 kol ïa ka Namdhari ha ka Sngi Palei. Katba ka SLFC ka dang ïai sah ha ka kyrdan ba saw ryngkat 26 poiñ.

Te kumta ka Shillong Lajong kan leit sha Jaipur na ka bynta ban ïakhun pyrshah ïa ka Rajasthan ha ka 16 tarik mynta u bnai.