Islamabad, Lber:
Katkum ki khubor, la iathuh ba ha ka jingbthei kaba jur ha ka Sngi Balang, 5 ngut ki la duh ei noh ia ka jingim bad kumba 5 ngut kiwei pat, ki la mynsaw na katei ka jingjia kaba la suba ban dei ka jingbthei jong ki bom ‘Improvised Explosive Device (IED)’, kaba la jia ha ka distrik Khuzdar jong ka thaiñ Balochistan hapoh Pakistan.
U heh ka tnat pulit Naal Police Station House Officer (SHO), u Bahawal Khan Pindrani u la iathuh ba katei ka jingjia ka dei ka jingbthei jong ki bom IED ba la pyndait ha kawei ka thuk-thuk kaba la leit ban pynbthei bad pynpoi da uwei ‘riew kheiñduh u bym don jing-ithuh.
Katei ka jingbthei ka la jia hapoh ka iew ‘Naal Market’ bad ia kitei kiba la mynsaw baroh la pynkit noh sha ka jakasumar kaba kham hajan na ka bynta ki jingsumar ba bniah bad kyrkieh.
U heh ka tnat ka koit- ka khiah jong katei ka distrik, u Rafiq Sasoli ruh u la iathuh ba 2 ngut napdeng jong kitei kiba mynsaw, ki dei kiba la mynsaw jur katta-katta bad ki bor pyniaid ka jaka sumar ki dang ialeh shitom ban pynkhiah bad pynim ia ki ha ka por kaba lyngkot bad kaba kloi-lan.
U Khan u la iathuh ba la phah ia ka kynhun pynlip bom sha katei ka jaka bad ki dang leit ban peit-thuh ia ka jinglong- jingman bad ki sakhi- sabut baroh haba iadei bad katei ka jingjia ha katei ka sngi.
Haba iakren bad ki lad pathai khubor pat, u heh Senior Superintendent of Police jong ka Khuzdar, u Javed Zehri, u la ong ba katei ka jingjia ka la jia hajan jong kawei ka kolej kaba don markhap bad katei hi ka iew bad ha katei ka jingbthei, don ruh katto- katne ki kali kiba la julor bad kiba la ingkhong lang na katei ka jingkhlaiñ jong utei u bom.
Ha kajuh ruh ka por, utei u heh pulit u la iathuh ba wat la katta, ki bor pahara ki la ioh pat ban tehlakam noh sa ia kawei ka jingjia thombor hi, hapoh ka thaiñ Pishin jong ka nongbah Balochistan.
U Myntri Rangbah ka Balochistan, Mir Sarfraz Bugti u la pynrem jur halor katei ka jingjia thombor bad ong ba ka sorkar kan ialeh katba lah ban ai ka jingsumar bad ka jingïarap kaba biang tam na ka bynta kitei kiba mynsaw bad kiba shah ktah baroh ha katei ka jingjia.
Namarkata, u Bugti u la ong ba ka sorkar Pakistan kan ïakhun pyrshah ia baroh ki jait kam thombor hapoh ka ri bad kan trei shitom ruh katba lah ban ratdyngkhong noh ia ka jingjur ki kam thombor hapoh ka ri.
Namar kumba la iohi hi, ki la don haduh palat 79 tylli ki kam thombor jong ki lehnoh ha u bnai ba la lah, kaba la wanrah ia ka jingduh ei ia ki mynsiem briew ba lui-lui jong 55 ngut ki riew paidbah bad 47 ngut ki bor pahara. Nalor jong kine, 45 ngut pat ki riew paidbah bad 81 ngut ki bor pahara ki dei kiba la shah ktah bad mynsaw ha kitei ki jingjia bapher ha kylleng jong ka ri.
Ha kitei ki jingjia, ki bor pahara jong ka Pakistan ki la ioh ruh ban pynliem ia kumba 156 ngut ki dkhot lehnoh jong ki kynhun bapher bapher bad 20 ngut pat ki dei kiba la shu mynsaw hapdeng kitei ki jingiakhun bad ki bor pahara ka Pakisnta. Katba, 60 ngut pat ki dei kiba la ioh ban bat bad kem noh da ki bor pahara hadien jong ki jing-iakhun.
