Shillong, Lber 07
U Sunil Chhetri, rangïalehkai ba paw jong ka ri, un sa pyndap ïa la ka rekod kaba 151 sien ki jingïalehkai bar ri ynda ka India kan ïakhun pyrshah ïa ka Bangladesh na ka bynta ka wat ba lai jong ka AFC Asian Cup 2027 ka ban long ha ka 25 tarik mynta u bnai ka ban long ha ka nongbah Shillong.
Une u rangïalehkai ba 40 snem ka rta, uba la shongthait shi snem na ka kam ïalehkai bar ri mynshem snem, u la wanphai biang na ka jingshongthait hadien ba la pynrung ïa ka kyrteng jong u ha ka thup jong 26 ngut ki rangïalehkai da u coach ka India, u Manolo Marquez, na ka bynta ki jingïalehkai bar ri (FIFA international).
Te kumta u Sunil Chhetri un shim bynta ha ka jingïalehkai paralok jong ka ri India pyrshah ïa ka Maldives ka ban long ha ka 19 tarik mynta u bnai bad ka Asian Cup 2027 (qualifier) pyrshah ïa ka Bangladesh ka ban long ha ka 25 tarik.
U Marquez u la pynpaw ba u la ïakren bad u Chhetri halor ka jinglah ban wanphai biang ryngkat bad ka jingïalehkai kaba kongsan kaba dang wan na ka bynta ka kynhun jong ka India. “Ka jingïoh rung sha ka Asian Cup ka long kaba kongsan bha na ka bynta jong ngi. Da kaba pyrkhat ïa ka jingdonkam jong kane ka lympung bad ki jingïalehkai kiba dangsah, nga la ïakren bad u Sunil Chhetri shaphang ka jingwanphai biang ban pynkhlaiñ ïa ka kynhun ïalehkai ka ri. Te kumta u la mynjur, bad kumta ngi la pynrung ïa u ha ka kynhun ïalehkai,” la pynpaw u coach katkum ka kyrwoh na ka All India Football Federation AIFF).
Kitei baroh ar tylli jingïalehkai kin long ha Shillong. Ha ka lympung ïaknieh jong ka Asian Cup ka India ka la shah kynthup lang ryngkat ka Bangladesh, Hong Kong, bad ka Singapore.
U Chhetri u la ïalehkai nyngkong ha u snem 2005 bad u la shongthait noh mynshem snem kum uwei na ki rangïalehkai ba pawnam tam ha ka jingïalehkai phutbol pyrthei. Ka jinglah thep kol jong u ha ki 151 tylli ki jingïalehkai ka buh ïa u ha khmat bha ban ïa baroh ha ka thup jong ki nongthep kol ba bun tam jong ka India.
Ïa ka nam rangthep kol ba kynsai ha ka pyrthei la bat da u khlur ïalehkai jong ka Portugal u Cristiano Ronaldo (135 kol), ha kaba la bud sa u Lionel Messi ka Argentina (112 kol), u Ali Daei ka Iran (108 kol) bad nangta sa u Chhetri. Kumta une u rangïalehkai ba 40 snem ka rta u don ka lad mynta ban long u rangïalehkai ba saw ban kynjoh sha 100 kol na ka bynta ka ri la jong lada u lah ban pynurlong ha ka ban thep kol ha kine ar tylli ki jingïalehkai ki ban long ha kane ka nongbah.
Ki kyrteng jong 26 ngut ki rangïalehkai ka India ki long Goalkeeper: Amrinder Singh, Gurmeet Singh & Vishal Kaith. Defender: Asish Rai, Boris Singh Thangjam, Chinglensana Singh Konsham, Hmingthanmawia, Mehtab Singh, Rahul Bheke, Roshan Singh, Sandesh Jhingan & Subhasish Bose.
Midfielder: Ashique Kuruniyan, Ayush Dev Chhetri, Brandon Fernandes, Brison Fernandes, Jeakson Singh Thounaojam, Lalengmawia, Liston Colaco, Mahesh Singh Naorem & Suresh Singh Wangjam.
Forward: Sunil Chhetri, Farukh Choudhary, Irfan Yadwad, Lallianzuala Chhangte & Manvir Singh.
