Kyiv, Lber:
Shisngi hadien ba ka America ka la pynsangeh noh ïa ki lad jingïarap na ka bynta ka tnat shipai jong ka Ukraine, u President ka Ukraine, Volodymyr Zelensky, ha ka Sngi Ba-ar pat, u la tyrwa ïa ka buit ïasuk kaba lah ban long bad ban pynkut noh ïa ka thma bad ka Russia, da kaba ong ba u kloi ban trei da kaba “tei” hapoh ka “jingïalam ba khlaiñ” jong u President jong ka America, Donald Trump. Ha ka jingkylla kaba sngew lyngngoh, u Zelensky u la pynpaw ruh ba u long uba kloi ban soi ïa ka soskular kaba ailad ïa ka US ban ïoh ïa ka spah marpoh khyndew jong ka Ukraine.
U nongïalam ka Ukraine, u la leit sha Washington ha ka Sngi Thohdieng jong ka taiew ba la dep ban soi ïa kane ka jingïateh soskular, hynrei la pynsangeh noh ïa ka hadien ba ka la wan mih pynban ka jingïakynad ha Oval Office hapdeng u President ka US- u Donald Trump bad une u President jong ka Ukraine, Volodymyr Zelensky bad pynlong ruh ïa u nongialam ka Ukraine ba un hap ban mih noh kloi na ka White House ha katei ka sngi khlem da ioh shuh ban pyndep ia ki kam bad ki jingthmu ba la khmih lynti baroh shi katta.
Hynrei ha ka Sngi Ba-ar pat la ong ba u Zelensky, u la ong ba u la pynkhreh ban wan sha ka miej ïakren khlem da pynslem ne buhteng shuh. U la ong ruh ba katei ka jingialang ba la long ha Oval Office ha ka taiew ba la leit, ka long kaba sngewsih bad kaba la nang pynsniew dur shuh-shuh ia ka jing-iadei hapdeng ka United States bad ka Ukraine.
