Shillong, Lber 09
U nongkiew lum na Shangpung, West Jaiñtia Hills District, u Teimiki Sungoh u la shah jied ban shah pyntbit ha ka ‘Search and Rescue Course’ ha Himalayan Mountaineering Institute (HMI kaba ha Darjeeling naduh 6 haduh 28 tarik mynta u bnai.
Kat kum ka kyrwoh ba la pyllait da ka Meghalaya Sport Climbing and Mountaineering Association (MeSCMA) ka la pynpaw ba ïa ka ‘Search & Rescue Course’ la pynrung kum ka jinghikai ba man ka por ha ki jaka ai jingpyntbit ban kiew lum ba la pynlong shisien shisnem.
Ki nongshah hikai kiba la lah ban pyndep bad ïoh ïa ka kyrdan ‘A’ tang ha ka Advance Mountaineering Course ki lah ban ïoh ïa kane ka jingshah hikai.
Ka jinghikai ka kynthup ïa ki kam wad bad pyllait im (Search & Rescue operations) ha ki lum makashang da kaba kdew kyrpang ïa ki buit pyllait im halor u maw, ka ïor bad u thah, First-aid, Mountain Navigation, Radio Telephony, Liaison bad kiwei kiwei bad ka jingdon bynta jong ki ha ka por ba ki pynlait im, ki jingpyntip ba ïohsngew bad ba ïohi kynthup ïa ka jingpyndonkam lyngba ki helicopter.
Kane ka jinghikai ka long kaba kongsan eh ban ïarap ïa ki bor ba dei khmih ïa kitei ki jaka bad kiwei kiwei ki seng ban thaw ïa la ki jong ki Search & Rescue Cell.
Ïa kane ka jingleit jong u la bei tyngka da ka tnat ïalehkai jong ka Sorkar Jylla.
