Shillong, Lber 11
Kum shi bynta ban pyllait ïa ki khun samla na ki jingsniew ba bun jait khamtam u drok uba la sdang ban jyllei kylleng sawdong ka Jylla, u nongïalam ba paw jong ka thaiñ Ri Bhoi, Bah Badhok Nongmalieh u la plie ïa ka madan ïalehkai futsal ba la tip kum ka ‘Rumen Futsal’ ha Mawdiangum kaba ha Nongpoh.
Ïa kane ka madan la wan ban plie da u MLA ka Nongpoh Constituency, Bah Mayralborn Syiem ryngkat ka jingdon lang ki ‘riew rangbah katei ka thaiñ bad kiwei. Ha kane kajuh hi ka sngi la pynlong ïa ka jingïalehkai paralok hapdeng ka Khasi Students’ Union Nongpoh Circle bad ka Ri Bhoi Youth Federation Nongpoh Circle.
Kumba ka paw ka jingdon kum kine ki madan futsal ha ka thaiñ Ri Bhoi ki la don lai tylli kiba kynthup ha Umsning, Umtrew bad ha Nongpoh. Kat kum ki khubor la ong ba kin dang don shuh shuh kum kine ki madan ki ban dangmih ha katei ka thaiñ.
