Shillong, Lber 11
Ka Rangdajied United FC ka la pynkut ïa ka jingïalehkai jong ka Shillong Premier League 2024 da kaba ka la pynliem noh ïa ka Nongthymmai SC da 5-1 kol ha ka Sngi Ba-ar ha SSA Stadium kaba ha First Ground, Polo.
U Pasborlang Khonglikong (43′ & 64′) bad u Freddy Jyrwa (54’& 69′) ki la thep mar ar kol bad ïa ka shi kol la thep da u Mebanaibok Kharbudnah (40′). Katba u Michaelson Kurbah (86′) u la lah ban pynphai kylla na ka bynta ka Nongthymmai ha shwa ban kut ka jingïalehkai.
Lyngba kane ka jingjop ka RUFC ka la ïai sah ha ka kyrdan balai da kaba kamai 35 point ha ki 18 sien ïakhun, katba ka Nongthymmai ka la ïaisah ha ka kyrdan ba khyndai (11 point) na ka bynta ban hiar kyrdan noh ryngkat bad ka Ryntih (6 point) sha ka First Division.
Kumba ka paw ka Rangdajied ka la jop 11 sien, ïakhaid ar sien bad shah rem san sien, katba ka Nong-thymmai ka la jop lai sien, ïakhaid ar sien bad shah rem 13 sien.
Ka Rangdajied kam shym la sdang da ka kynhun kaba khlaiñ jong ka ha kane ka jingïakhun, ha kaba u coach u Aibanjop Shadap u la jied ban ailad da ki katto katne ki rangïalehkai jong u kiba kham duna bad ka la shim por katto katne ban pynpra ïa ka bynta kaba shadien jong ka Nongthymmai.
U Freddy Jyrwa u la pynbuk ïa ka bol kaba biang eh na ka bynta u Mebanaibok, u bym shym la pynlehnohei ban pynkhih jar nyngkong. Tang hadien lai minit kane ka kynhun ka la pynbud biang ïa ka kol kaba ar lyngba u Pasborlang.
Hadien ba la bteng ïa ka jingïakhun jong ka kylla miet. u Ieitlang Syiemlieh u la ïarap ban pynbuh bol na ka bynta u Freddy ban thep ïa ka kol ba nyngkong jong u ha kane ka sngi. Nangta u Pasborlang u la thep biang ïa ka kol kaba ar jong u ha ka minit kaba 64 hashwa ba u Freddy un pynurlong ïa ka RUFC ban tam da 5-0 kol.
Watla ka Nongthymmai ka la shah thep haduh 5 kol, hynrei shwa ban wai ka la lah ban pynphai kylla shi kol lyngba u Michaelson bad ban mad syndon ïa ka jingshah rem khadlai ha kane ka lympung.
Ha kawei pat ka liang ki bor pynïaid ka SSA ki la pymbna ba ka jingïakhun kaba khatduh haduh ka Mawlai SC bad ka Shillong Lajong FC kin ban ïaknieh ïa ka nam lahduh kan long ha ka por 5:30 janmiet.
