Shillong, Lber 11
Ka India ka la shah pynngat ryngkat ka Nepal bad ka Sri Lanka kiba don ha ka Group-B na ka bynta ka SAFF U-19 Championship 2025, hadien ba la dep pynïakap ïa ki kynhun ha ka Sngi Ba-ar ha Kathmandu, Nepal.
Ka Golden Jubilee Stadium ha Yupla kaba ha Arunachal Pradesh, kan pynlong ha ka sien kaba lai ïa kane ka lympung ka ban sdang naduh 9 haduh ka 18 tarik u Jymmang mynta u snem. Kane ka stadium ka dei kaba la pynlong ruh ïa ka wat kaba khatduh jong ka Santosh Trophy ha u Lber jong u snem ba la lah.
Ka Maldives, Bhutan bad ka Bangladesh ki la shah kynthup ha ka Group-A. Na ka bynta ka jingïakap, ïa ki kynhun la pynrung ha ki lai tylli ki pot (group) katkum ka jingkheiñ ba thymmai jong ka FIFA Men’s Rankings naduh u Nohprah jong u snem 2024.
Ar tylli ki kynhun kiba wan shakhmat eh na kawei pa kawei ka group kin rung sha ka semi-final ka ban long ha ka 16 tarik u Jymmang bad ka phainal kan long ha ka 18 tarik u Jymmang.
Ka India ka dei ka kynhun kaba la bat ïa ka nam lahduh hadien ba ka la pynliem ïa ka Pakistan da 3-0 kol ha ka phainal jong u snem 2023 kaba la long ha Kathmandu. Ha u snem 2024, la pynlong ïa kane ka lympung na ka bynta ki U-20, ha kaba ka India ka la shah rem noh ha ka Bangladesh lyngba ka tie-breaker ha ka semi-final.
Kane ka long ka sien kaba saw ba ka India kan pynlong ïa kane ka lympung ïalehkai SAFF hadien ka U-20 jong ki shynrang kaba la long ha Bhubaneswar ha u snem 2022, ka U-18 jong ki kynthei kaba la long ha Jamshedpur ha u snem 2022 bad ka U-15 ki shynrang kaba la long ha Kalyani ha u 2019.
Te kumta ka India kan pynkhreh ban ïa-khun pyrshah ïa ka Sri Lanka ha ka 9 tarik bad ïa ka Nepal ha ka 13 tarik u Jymmang ha shwa ban kan jam sha ka semi bad final.
