London, Lber:
Ka Britain ha kane ka sien, ka la maham ba kan pynjari biang da ki kyndon jong ka U.N. pyrshah ïa ka Iran lada donkam ban khanglad ïa ka ba kan ïoh ïa u tiar nuclear, katba ka Security Council ka dang khmih lynti ban ïakynduh na ka bynta ban ïakren halor ka jingpynheh jong ka Tehran ïa ka stock uranium jong ka kaba jan bad ka kyrdan tiar ïakhun ba shyrkhei.
Hynrei na ka liang ka Iran, ka la kyntait ba ka kwah ban shna tiar ialeh nuclear.
Ki jylla sepngi ki ong ba kam donkam ban pynriewspah ia u Uranium haduh katne hapoh kano- kano ka prokram jong ki riew paidbah bad ba ym don kawei pat ka ri kaba la leh ia kane khlem da pynmih ia u bom nuclear. Ka Iran, ka ong ba ka prokram nuclear jong ka, ka long kaba suk.
Ia katei ka jingialang kaba khang khyrdep la khot da ki hynriew ngut na ki 15 ngut ki dkhot jong katei ka council – ka U.S., ka France, ka Greece, ka Panama, ka South Korea bad ka Britain.
Ka U.N. jong ka Iran ka la kynnoh ïa ka ri America ba ka wad ban pyndonkam da ki tiar ïa ka U.N. “ban pynjur ïa ka thma ha ka liang ka ioh ka kot pyrshah ïa ka Iran,” da kaba bynrap ha ka jingthoh ha ka rynsan ‘X’: “Ïa kane ka jingleh be-ijot kaba shyrkhei dei ban kyntait ban ïada ïa ka jingshaniah jong ka dorbar.”
Ka U.S. mission sha ka U.N. ka la ong ha ka jingpynbna hadien ka jing-ialang jong ka council ba ka Iran ka dei “ka ri kaba marwei ha ka pyrthei kaba khlem ki tiar nuclear kaba pynmih ïa u uranium u ba la pynriewspah bha, naka bynta kaba kam don kano kano ka jingthmu kaba lah ban pyni ia ki dak jong ka shongsuk- shongsaiñ.”
Kumta ruh ka la kynnoh ïa ka Iran ba ka la pyrshah ïa ka dorbar ïada bad ka la pynkheiñ ïa ki jingkitkhlieh jong ka IAEA.
