Jerusalem, Jylliew:
U nongrah ktien jong ka Israel sha India, u Reuven Azar, u la kynnoh ba ka kynhun lehnoh Hamas ka la pynïar ïa ki kam bad jingiadei jongka wat shaduh ka ri Pakistan bad sha Bangladesh bad kane ka la wanrah ïa ka jingsngewkhia ioh kan nang pynjur shuh-shuh ïa ki kam thombor jong ki lehnoh ha ka thaiñ Middle East.
Ha ka jingïakren bad u Senior Executive Editor jong ka NDTV, u Aditya Raj Kaul, une u nonglam khubor u la pynpaw ïa ka jingsngew artatien kaba jur halor ka bynta jong ka Pakistan kum ka nongpynïasuk ha ka jingïadei kam ha ki thaiñ bad u la buh jingkylli ïa ka jingshimkhia jong ka Pakistan ban ïakhun pyrshah ïa ki kam lehnoh.
Haba kren halor ka jong ka Pakistan dang shen ban buh ïalade kum ka jingkieng hapdeng ka America bad ka Iran, u Azar u la ong ba ka Israel kam shaniah ïa ka Pakistan bad ka peit bniah bha ïa ka jinglong nongïalam jong ka. Kane ka jingkren ka wan ha ka por ba ka Islamabad ka la pyrshang ban pynpaw ïalade kum ka nongïashim bynta ha ki jingpyrshang ban pynsuk ha ka thaiñ katba ha kajuh ka por ka ïakynduh ïa ka jingshah bishar bniah halor ki jingkynnoh ba kyrshan ïa ki kynhun lehnoh bad ka jingbym shong suk shongsaiñ ha ki bynta jong ka thaiñ.
“Ki don ki ri kiba pyrkhat ba ka jingsuk ka mut ban kyntiew ïa ka jinglong jingman ha kaba ka Israel kam don”, la ong u Azar, da kaba kynthoh ba ka jingsngewthuh jong ka Israel ïa ka jingsuk ka iapher ha ka nongrim na ki katto katne ki nongiashim bynta ha katei ka thaiñ. U la bynrap ruh ba ka Pakistan kam dei tang ma ka, ka ri kaba ka Israel ka buh jingkylli ïa ki jingthmu jong ka, da kaba kynthoh ruh ïa ka bynta jong ka Qatar haba iadei bad ka jingiadon bynta jongka ha katei ka thma ha Middle East.
Ka jingdawa kaba kongsan tam jong u nongmihkhmat ka long halor ka Hamas. Katkum ka jingong u Azar, ka Israel ka la buddien ïa kaei kaba ka ngeit ba ka dei ka jingtreikam jong ka Hamas ha Pakistan bad Bangladesh naduh kaba sdang jong ka jingleit thombor jongka ha ka 7 tarik u Risaw ba la wanrah da ka kynhun Palestine pyrshah ïa ka Israel. Watla u kam ba don ki khubor kiba la pynshong nongrim ha ki jingtip kiba lah ban ioh paidbah, u la ai jingmut ba ki lah ban don kiwei pat ki kam kiba dang sah shabar jong ka jingpeit paidbah.
“Ngi la bud dien ïa ka jingtreikam jong ka Hamas ha Pakistan bad Bangladesh,” u la ong bad bynrap ba ki seng lehnoh kiba leh donbor ki lah ban peit ïa ki kam thombor ha 7 tarik u Risaw kum ka nuksa na ka bynta ki kam sha kiwei pat ki jaka. U Azar, u la maham ba kum kine ki jingjia, ki dei ban pynsngewkhia ïa ki sorkar ha kylleng ka thain bad u la pynpaw ba ka Israel, ka la iasam ïa ki jingeh jongka, bad ki bor synshar ka India.
U nonglam khubor u la ong ba u la pynshlur hi dalade ïa ki jingïakren bad ki jingïalang bad ki heh kiba buddien ïa ki jingïakhih jong ki lehnoh, da kaba pynksan ba ka jinglah ban saphriang jong ki kynhun lehnoh ba shyrkhei ka pyni ïa ka jingeh kaba kham heh ha ka liang ka jingïada. Kane ka jingkren jong u ka lah ban khring ïa ka jingpyrkhat ha India, kaba la pynpaw slem bha ïa ka jingsngewkhia halor ki kam lehnoh ba ïaid lait ïa ki pud bad ki kam jong ki seng lehnoh ha South Asia.
