Washington, Jylliew:
U Vice President jong ka US, u JD Vance, u la pynkut noh ia ki khubor, kiba kam ba ka America, ka ai $300 billion, sha ka Iran, kum shi bynta jong ka pisa ban shna thymmai, katkum ka jingiateh khaii pateng ba shipor jongki. U Vance u la ong ba, ha ka jaka jong kane, ka Washington ka thmu ban ailad ïa kiwei pat ki ri ban bei tyngka ha Iran lada ka kohnguh ïa ki kyndon jong ka jingïateh kular hapdeng ka US bad ka Iran.
Kane ka jingpynshai ka long ha ka por ba ki khubor ki ïathuh ba ka Iran ka lah ban ïoh ïa ka pisa na ka bynta ban shna thymmai kaba $300 billion kum shi bynta jong ka jingïateh kular ïasuk ba la pynïasuk da ka sorkar jong u President Donald Trump.
Haba la ïakren halor katei ka fund da ka Megyn Kelly ha ka “The Megyn Kelly Show”, u Vance u la batai ba hapoh katei ka jingiateh, lada ka Iran ka kohnguh ia ki kyndon jong ka jingiateh, kan weng noh ia ki jingpynjari kyndon ia ka Islamic Republic ban pynshlur ia ka jingbei tyngka ha katei ka ri, kaba pynlah ia ka jingmih pisa.
“To ngin ong, kum ka nuksa, ba ka United Arab Emirates, kaba la long kawei na ki paralok ba bha tam kaba ngi la don ha kane ka thaiñ. To ngin ong ba ki kwah ban bei tyngka ha ka jaka pynmih bor ding nuclear ha Iran. Ki shisha kim lah ban leh ïa kata khlem da weng noh ïa ki katto katne ki jingpynjari kiba don ha ka rukom pynïaid pisa jong ka pyrthei ban pynlong ïa kata kaba lah,” ong u Vance.
“Mynta, hato ki Emirati kin leit ban bei tyngka ha Iran, ne hato ka America kan ailad ia ki Emirati ban bei tyngka ha Iran? Lymda ki nong Iran kin pynkylla ia ka jinglong jong ki? Em. Kumta kine ki briew baroh ki ong, “Hooid, phi tip, phi ai pisa ia ka Iran.” Em, em, em. Ngi ong ba lada ki nong Iran ki pynkylla ia kine ki jinglong jong ki ha Iran. ban tei pat ia la ka ri bad ban thaw katto katne ka jingroi jingpar na ka bynta ki briew jong ki,” u la bynrap.
