UAE, Jylliew:
Ka United Arab Emirates, ka la pynbna ban khang noh ïa ki khynnah kiba hapoh 15 snem ka rta na baroh ki rynsan ‘Social Media’, da kaba ïasoh lang bad ka kynhun jong ki ri, kiba la dep leh ïa kane, kynthup ïa ka Australia, Britain bad Canada, ban shim ïa kijuh ki sienjam naka bynta ka bha- ka miat bad ka jingshngaiñ jong ki khynnah samla kane ka juk ba mynta.
Kumta ruh la ong ba ki nongpyniaid jong kitei ki rynsan paidbah ‘Social Media’ kin hap ban buddien bad khang noh mardor ïa ki ‘Account’ ba la shna da ki khynnah kiba hapoh 15 snem lane ki lah ban shah khang, ong ka rai jong ka kynhun myntri, kaba ai por ïa ki ban kylla kaba 12 bnai.
“Kane ka rai ka buh ïa ka rta kaba rit tam ban pyndonkam ïa ki social media ha ka 15 snem,” la ong ka tnat pathai khubor ba tikna jong ka WAM, da kaba kdew ïa ka rai jong ka kynhun myntri.
“Ia ki khynnah kiba hapoh kane ka rta la khang ban plie, pyndonkam, ne pyntreikam ïa ki account shimet ha baroh ki rynsa paidbah ‘Social Media.”
La khang ruh ïa ki ban “ïoh ïa ki jingdonkam ba pura jong kum kine ki rynsan, kynthup ïa ka jingïadei para briew, ka jingpynmih kot, ka jingai jingmut, ka jingïasam, ka jingïasoh bad ki kynhun paidbah, ki lad ba plie, lane kino kino ki jaka ïakren kiba heh”, la ong ka khubor.
Hadien ba ka Australia ka la sdang ïa ka social media bar kaba nyngkong eh ha ka pyrthei na ka bynta ki khynnah kiba hapoh 16 snem ha u bnai December, katto katne ki ri ki la bud ïa kane ka rukom kynthup ïa ka Britain kaba la pynbna ban khang mynta ka taiew.
Ki kynhun jong ka UAE kiba synshar ïa ki lad pathai khubor bad ki jingïadei ki don “ka bor ban shim ïa baroh ki lad ki lynti kiba donkam (pyrshah ïa ki lad pathai khubor ha ka jingjia lada jia ba kim kohnguh ïa ki kyndon”, ong ka WAM.
Kine ki kynthup ïa ka “jingmaham ne jingkhang shi bynta ne pura ïa ki platform lane ka jingpynngat ïa ki jingpynshitom ba iadei bad ka bor synshar”.
