New York, Jylliew:
Ki bor pyniaid ka New York, ki la iathuh ba ha ka Sngi Palei, la iohsngew ïa ka jingsawa ki ktang suloi na Times Square ha ka por mynsngi, ha kaba ki paidbah kiba leit ban shangkai pyrthei bad kiba don ha katei ka bynta, ki la iaphet kulmar namar ka jingsheptieng bad ka jingpyrshang ban wad jakarieh ban lait im. Ki pulit ki iathuh ba ki la thwet mardor ïa utei u suba don kti ha katei ka jingjia bad na ka liang ka tnat pynlip ding, ka la iathuh ba uwei u briew u la mynsaw bad la pynkit sha jakasumar hynrei um shym la phla ba u don jingtip eiei haba iadei bad katei ka jingjia.
Katei ka jingjia, ka la jia ha ka por kumba 3:40 baje nongphai sngi jong ka sngi Palei, tang hadien katto katne por ba ka jingiaid paidbah kaba rakhe ïa ka New York Knicks kaba la jop ha ka NBA, ka la pyndap ïa ki surok jong ka lower Manhattan. Ki heh sorkar ki la iathuh ba la pyntreikam kumba 10 hajar ngut ki pulit na ka bynta katei ka jinglehkmen.
Ka tnat pulit jong ka New York ka la bynrap ba katei ka jaka ka la khapngiah bha da ki nongwan jngohkai World Cup kiba la don ha katei ka nongbah naduh ba la sdang katei ka lympung ha ka taiew ba la dep.
Ki video ba la sam ha ki social media ki la ring dur ïa ka khyllipmat ba ki jingsiat ki la bthei, kaba la pynlong ïa ki briew ha Times Square ban mareh ban ioh ïa ka jingshngain. La iohi ba ki nongjngohkai pyrthei bad kiwei kiwei kiba don hajan ki ialeh ban wad jaka rieh katba ka jingsawa jong ki suloi ka la saphriang lyngba katei ka jaka.
La iohi ïa ki briew ba ki ïa mareh ban wad jaka rieh katba ki suba donkti ki phet krad sha surok, la beh ïa ki da ki pulit kiba la dep ban pahara ha katei ka jaka kaba bun ki nongjngohkai pyrthei. Ka jingshah siat ka la jia tang katto katne meter na kawei ka kali pulit kaba ieng.
La ap ïa ki jingtip ba bniah.
Kane ka jingjia ka la jia katto katne sngi hadien ka jingjia shah siat ba kyrpang ha Times Square ha ka 16 tarik u Iaiong, ha kaba ka jingrakhe hadien ka jingjop jong ka New York Knicks ha ka NBA hadien ka jingïapher kaba 53 snem ka la kylla long ka jingkulmar.
Tang hapoh katto katne kynta hadien ka jingjop, ki video ki la pyni ïa ka jingsiat suloi ha ka jaka ba la bun briew, kaba la phah da ki spah ngut ki nongleit lehkmen ban mareh ban wad jaka rieh. Ha kawei pat ka clip, la iohi ba ki pulit ki la ioh kurup ïa ka suloi kaba la buh load na uwei u riew shimet.
Ha kawei ka video ba la pynphriang paidbah, la ïohsngew ym duna ïa ka hynriew tylli ki jingsiat hajan ka jingïakynduh jong ka 42nd Street bad ka Broadway, ka jaka ba kongsan ha kaba ki paidbah kiba bun ki la ïalum da ki kynta ha ka miet sngi saitjaiñ ban rakhe ïa ka jingjop.
Uwei u khynnah ba dang 17 snem ka rta u la mynsaw ha katei ka jingshah siat bad la pynkit ïa u sha Hospital da ka kali pulit.
