Shillong, Lber 13
Ka Real Madrid ka la lah ban pynthikna ban jam sha ka quarter final ha ka Champions League, hadien ba ka lah ban pynliem noh ïa ka Atletico Madrid lyngba ka tie-breaker da 4-2 kol hadien ba ki la ïakhaid mar 2-2 ha ka aggregate ha ka Sngi Palei.
Ka jingïalehkai ka la long kaba itynnad haduh katta-katta ha kaba baroh ar tylli kynhun ki la ïakhun tyngeh naduh kaba sdang. Wat la ha ka wat kaba nyngkong ka Real Madrid ka la tam da 2-1 kol hynrei da ka jinglah ban pynkhih jar tang mar ïasdang ka jingïalehkai lyngba u Conor Gallagher ka la pynlong ïa ka Atletico ban ïaryngkat kol ha ka wat ba ar.
Ha ka jingshisha ka Real Madrid ka la dei ban jop hapoh ki 90 minit, hynrei u Vinicius Junior u la pynlehnohei ïa ka kabu kaba u la ïoh lyngba ka penalty bad ban pynlong ïa katei ka kynhun ba kan hap ban ïakhun ïa ka extra time bad khatduh ha ka jingïashut tie-breaker.
Ha ka jingshut tie-breaker ka la long kaba phylla namar ka la don ka rai kaba la pynkulmar jingmut ban khanglad ïa ka bol ba la shut da u Julian Alvarez na ka bynta ka Atletico hadien ka jingbishar bniah jong ka VAR.
Wat hapdeng ka jingshah pynphai kylla, ka Atletico ka la bat ïa la ka jong ka jinglong, hynrei ha kaba kut dei ka Real Madrid kaba la lah ban jop lyngba u Antonio Rudiger. Kumta da kane ka jingjop ka Real Madrid kan ïatynjuh bor bad ka Arsenal.
Kumjuh, ka Arsenal bad ka Aston Villa ki la pynskhem ïa la ka jaka ban jam sha ka quarter final jong ka Champions League da kaba pynliem ïa ka PSV Eindhoven bad ka Club Brugge.
Ka jingkiew jong ka Arsenal kam shym la don jingartatien satia hadien ba ka la jop da 7-1 ha ka wat kaba nyngkong, katba ka Aston Villa ka la lah ban pynliem ïa ka kynhun jong shiphew ngut ki rangïalehkai ka Club Brugge da 6-1 kol.
U Marco Asensio u la long u khlur na ka bynta ka Aston Villa, ha kaba u la thep ar kol na ka bynta ban bteng ïa la ka rukom ïalehkai ba itynnad bad ïa kawei pat la thep da u Ian Maatsen. Te kumta ka Aston Villa mynta kan pynkhreh ban ïakhun pyrshah ïa ka PSG ha ka quarter-final.
Ka Borussia Dortmund ruh ka la lah ban pynskhem ïa la ka jaka sha ka quarter final hadien ba ka la lah ban pynliem ïa ka Lille da 3-2 kol. Kane ka kynhun kaba na Germany kan ïa -khun pyrshah ïa ka Barcelona ha ka quarter-final.
