Shillong, Naitung 27
U Tiger Shroff u la nangjan ban ïoh ïaleh -kai ha ka sien kaba nyngkong eh ha ka 135th Durand Cup, hadien ba dangshen, u la shah kynthup hapoh ka kynhun ïalehkai jong ka Mumbay FC.
Kat kum ki tyllong khubor la ong ba une u tyngshop ba paw jong ka ri India, u la paw ba u kilanmet lang bad ka kynhun hashwa ba un wan lang bad ka kynhun sha Shillong ha ka 30 tarik na ka bynta ban pynkhreh ïa ka jingïakhun ba nyngkong jong ka Group-E pyrshah ïa ka Langsning FC ha ka 3 tarik u Nailar.
“U Tiger u la pynrung kyrteng bad ka kynhun bad u lah ban mih madan ha ka jingïalehkai kaba khatduh jong ka jingïalehkai group. U la kilanmet man ka por bad ka kynhun. Ka Mumbay FC kan leit sha Shillong ha ka 30 tarik u Naitung.”
U Shroff u la sdang ïa kane ka klob ha u snem 2024 bad u dang bteng ban long kum u nongïalam ba hakhmat eh jong kane ka klob. Naduh katei ka por, ka Mumbay FC ka la mad ïa ka jingkiew kaba sted, ha kaba ka la jop ïa ka Maharashtra State Club League Championship kaba nyngkong eh bad ka la wan ha ka kyrdan kaba lai ha ka I-League 3 ha ka samoi ba la dep. Kane ka jinglah ban ïalehkai bha ka la pynlong ïa ka ban ïoh rung nyngkong eh sha ka Durand Cup.
Hadien ba ka la shah kynthup ha ka Group-E, ka Mumbay FC kan pynkhreh ban ïakhun pyrshah ïa ka Shillong Lajong FC, Nongkseh Sports & Cultural Club bad ïa ka Langsning FC, ha kaba baroh kine ki jingïalehkai kin long ha Shillong.
